Nebári 25 jyldyń ishinde Qazaqstan álemniń birqatar elderiniń 100 jylda qoly jetpegen, armanyna aınalǵan damý deńgeıine kóterildi. Keshegi Qazaqstan qandaı edi, búgingi Táýelsiz elim qandaı?! Respýblıkamyzdyń egemendik alǵan jyldardaǵy jasaǵan qaryshty qadamy bárimizge belgili. Árbir is-áreketi kóz aldymyzda ótti. Barlyq sala boıynsha elimizdiń jetken tabystaryna kýámiz. Basqaǵa barmaı-aq, sport salasyndaǵy qazaq saıypqyrandary baǵyndyrǵan bıikteri týraly aıtsaq ta jetkilikti.
Keshegi keńestik zamanda kúsh-qýaty tasyp, sheberligi asyp tursa da meniń qandastarymnyń álemdik ár deńgeıdegi jarysqa shyǵýǵa joly bola bermedi. Táýelsizdik alǵan jyldary elimizdiń sportshylary tarıhta buryn-sońdy bolmaǵan jeńimpazdyq marapattardy ıelenip, qanshama dúnıejúzilik jarystardyń juldyzy atandy. Ásirese, elimizdiń jastary Olımpıada oıyndarynda óz ornyn myqtap aıqyndap aldy.
Elbasymyz – Qazaqstan Respýblıkasynyń Tuńǵysh Prezıdenti Nursultan Nazarbaev Astanada ótken Táýelsizdik merekesine arnalǵan saltanatty jınalystaǵy baıandamasynda beıbitshilik elshisine aınalǵan sportshylarymyz týraly tebirene sóıleýi de tekten-tek emes. El sportshylarynyń atynan sóz alǵan Olımpıada chempıondary – Dmıtrıı Balandın men Danııar Eleýsinovtiń sózine Elbasymyz da, jınalǵan halyq ta zor zeıin qoıdy. «Qurmetti Nursultan Ábishuly! О́zińizdiń «Alǵa, Qazaqstan!» degen sózińizdi elimizdiń resmı uranyna aınaldyrý nıetimiz bar. Bul barsha qazaqstandyqtardyń máńgilik uranyna aınalar edi», dedi sonda Olımıada jeńimpazdary.
Merekelik jıynǵa qatysýshylar qoshemet tanytyp, Elbasymyzdyń ózi Danııardyń atyn atap, bul urandy qoldaıtynyn bildirip, rızashylyǵyn aıtty.
Osynyń ózi bolashaǵy jarqyn jas memleketimizdiń sportta ǵana emes, elimiz damýynyń barlyq salasynda únemi alda bolatynyn meńzegendeı. Endeshe, Alǵa, Qazaqstan!
Jaqsylyq ÚShKEMPIROV,
Máskeý Olımpıadasynyń chempıony
ALMATY