Turǵyndarǵa úsh tartý jasaldy. Maǵjan Jumabaev aýdanynyń ortalyǵynda «Qazaqstan Respýblıkasynyń memlekettik rámizderi» memorıaly jáne Táýelsizdiktiń 20 jyldyǵy atyndaǵy saıabaq ashyldy.
Saltanatty rásimge oblys ákimi Serik Bilálov qatysyp, kóp balaly analar men eńbek ozattaryn marapattady. Kámeletke tolǵan jasóspirimderge jeke kýálikter tapsyrdy. Osy kúni Qaraqoǵa aýylynda 75 oryndyq balabaqsha paıdalanýǵa berildi. Burynǵy kásiptik-tehnıkalyq ýchılısheniń eski ǵımaratyn kúrdeli jóndeýden ótkizýge 56 mıllıon teńge jumsaldy. Aımaq basshysy mektepke deıingi tárbıe ornyna plazmalyq teledıdar tartý etti.
О́mir ESQALI, Soltústik Qazaqstan oblysy.
Stýdentter úıi ashyldy. Jáńgir han atyndaǵy Batys Qazaqstan agrarlyq-tehnıkalyq ýnıversıtetinde 560 oryndyq toǵyz qabatty stýdentter úıi salynyp paıdalanýǵa berildi. Onyń qurylysyna respýblıkalyq bıýdjetten 957 mıllıon teńge bólingen. Jańa ǵımaratta stýdentterdiń oqyp izdenýlerine, ǵylymı-shyǵarmashylyq jumystarmen aınalysýlaryna ári tynyǵyp demalýlaryna qajetti barlyq áleýmettik-turmystyq jaǵdaılar bar. Eki adamdyq turǵyn bólmeler sońǵy úlgidegi sándi de sapaly jıhazdarmen jabdyqtalǵan. Stýdentter úıinde kitaphana, demalys bólmeleri, oqý zaldary, ashana, kompıýter kabınetteri jumys isteıdi. Sonymen birge, elıtarly jataqhananyń ár qabatyna teledıdar, avtomatty kir jýý mashınalary qoıylǵan.
Temir QUSAIYN, ORAL.
Oblystyq óner murajaıyna tartý. Elimizdiń 20 jyldyq damý belesterine atyraýlyqtar ótken aptada «Álem qaýymdastyǵy moıyndaǵan Qazaqstan» atty fotokórmeni tamashalaǵanda kóz jetkizdi. Bul fotokórmeni Atyraýdaǵy oblystyq óner murajaıyna arnaıy ákelgen «Qazaqstan halqynyń rýhanı damý qory» AQ-tyń bólim bastyǵy Hadısha Erseıitovanyń aıtýynsha, bir myńnan asa fotolarmen aıshyqtalǵan fotokórme «Egemen Qazaqstan», «Kazahstanskaıa pravda» gazetteriniń fototilshileri túsirgen týyndylarmen tolyqqan. Osy fotokórmege qoıylǵan týyndylardyń arasynan 105 fotosýret oblystyq óner murajaıyna tartý retinde qaldyryldy.
Joldasbek ShО́PEǴUL, Atyraý oblysy.
292 mln. teńgege jańa attraksıondar. Qyzylordada turǵyndar demalatyn oryn asa kóp emes. Qalalyq demalys baǵyndaǵy balalarǵa qyzmet kórsetetin oıyn alańdaryna jıyrma jyldan astam ýaqyt bolǵan. Ábden eskirgeni birden baıqalatyn. Jyl basynda oblys ákimi Bolatbek Qýandyqov qalalyq demalys baǵyndaǵy oıyn alańdarynyń jańalanatynyn, onyń baǵasy halyqqa tıimdi bolatynyn aıtqan. Ákim ýádesin oryndady. О́tken aptada saıabaqqa jańa attraksıondar ákelinip, el ıgiligine berildi. Ol úshin oblystyq bıýdjetten 292 mln. teńge bólindi. Osy qarjyǵa Italııadan «Tańǵajaıyp kerýen», «Aldaspan», «Shattyq poıyzy», «Sıqyrly uıashyq», «Baldyrǵan», «Qanatty tulpar» attraksıondary satyp alyndy. Balalarǵa jasalǵan bazarlyqty tartýǵa aımaq basshysy Bolatbek Qýandyqov qatysty.
Erjan BAITILES, Qyzylorda.
Ortalyq baqtaǵy dostyq merekesi.О́tken aptada oblys ortalyǵynda Qazaqstan halqy Assambleıasy jergilikti bólimshesi uıymdastyrǵan «Bir shańyraq aıasynda» atty dostyq festıvali aıaqtaldy. Festıval 21 mamyrda bastalyp, elimizdiń Konstıtýsııasy merekesi kúnine oraı qorytyndy konsertin jasady. Osy kúnge oraı «Vozrojdenıe», «Polonııa» nemis, polıak mádenı ortalyqtarynyń aýdandardaǵy ókilderi shaqyryldy Ombylyq «Polonez» atty polıak birlestigi qonaqqa keldi. «Festıvaldi uıymdastyrýdaǵy maqsat qala turǵyndaryn ár ulttyń ónerimen tanystyrý, halyqtar dostyǵyn úlgi etý», deıdi QHA apparatynyń meńgerýshisi Seısenbaı Jetpisbaev. Ár apta saıyn qalalyq baqty án men bıge bólegen mádenı ortalyqtar qala turǵyndarymen kelesi jazda «Dostyq festıvalinde kezdeskenshe!» dep qoshtasty.
Farıda BYQAI, Pavlodar.
Jeti dárigerge páter berildi. Shyǵys Qazaqstan oblysynyń ákimi B.Saparbaev Kókpekti aýdanynyń burynǵy ortalyǵy – Samar aýylynda bolǵan kezinde «Romat» farmasevtik kompanııasynyń dárihanasyn tamashalap kórdi. Dárihana ishinde eki myńnan astam dári-dármek túrleri, balalarǵa arnalǵan osynshama taǵam túrleri bar eken. Baǵalary arzan. Sol kúni óńir basshysy kúrdeli jóndeýden ótken Mádenıet úıin aralap, jeti dárigerge jańa páterdiń kiltin tapsyrdy jáne 350 myń teńge kómek kórsetti.
Ońdasyn ELÝBAI, Shyǵys Qazaqstan oblysy.
Ǵasyr belesinen bıik ǵumyr. Kókshe jurtshylyǵy ózderiniń dańqty jerlesi, jazýshy Ibragım Salahovtyń 100 jyldyǵyn úlken tebirenispen atap ótti. Qazaqstan Táýelsizdiginiń 20 jyldyq merekesi aıasyndaǵy qurmet sharasyna Tatarstan Respýblıkasynyń ókiletti ókili Rafaıl Ablakov bastaǵan delegasııa qatysty. Saltanatty keshte oblystyq tatar mádenı ortalyǵynyń tóraǵasy Farýk Bogapov, jýrnalıst Alııa Ahetova jazýshynyń ómiri men shyǵarmashylyq joly týraly baıandama jasady. Ibragım Nızamuly 1911 jylǵy 30 tamyzda aǵash sheberiniń otbasynda týǵan. Ol aýyr da ónegeli tirshilik keshti. 1937 jyldyń 24 qazanynda «halyq jaýy» retinde jazyqsyz sottalyp, on jylǵa «ıtjekkenge» aıdaldy. Kókshelik jazýshy «Kolyma qasireti» romany úshin 1990 jyly Tatarstan memlekettik syılyǵynyń laýreaty atansa, Qazaqstan Prezıdentiniń qolynan «Parasat» ordenin alǵan.
Baqbergen AMALBEK, Kókshetaý.