El násibin eselegen

Aýyl sharýashylyǵyn qarjylaı qoldaý qorynyń qamqorlyǵy Búginde aýyl turǵyndaryn jumyspen qamtyp, olardy kásipkerlikke tartý mindeti kún tártibinde tur. Elbasynyń bul tapsyrmasyn oryndaýdyń tıimdi bir jolyn «Aýyl sharýashylyǵyn qarjylaı qoldaý qory» AQ usynyp, agrarly salada jaqsy nátıjege jetip otyrǵanyn aýyl halqy rastaýda. Almaty oblysynyń Qaratal aýdanyndaǵy Úshtóbe aýylynyń turǵyny Qaırat Baekenov turaqty jumys ornyn taba almaı júrgen jandardyń biri edi. Jaldamaly jumys, jeke avtokóligimen adam tasý sekildi kúnkóris kózderin isteı júrip aýdandaǵy Jumyspen qamtý ortalyǵyna jumyssyz sanaty boıynsha tirkelgen bolatyn. Kóp uzamaı «Jumyspen qamtýdyń jol kartasy-2020» memlekettik baǵdarlamasy aıasynda nesıeleýge joldama aldy. «Aýyl sharýashylyǵyn qarjylaı qoldaý qory» AQ júzege asyratyn «Bereke» baǵdarlamasyna sáıkes mal bordaqylaýdy damytý baǵytynda jumys bastaýǵa joly ashyldy. Zańnama talabyna saı aýyl sharýashylyǵy salasy mamandarynyń kómegimen qujattar esh kedergisiz toltyrylyp 1,6 mıllıon teńgeni 4 jylǵa jyldyq 6 paıyzdyq ústememen lezde alǵanynda abdyrap qalǵany da aqıqat. Sebebi, jyldar boıy aýylda jumyssyz júrgen jannyń otbasyn asyraý, ósip kele jatqan balalardy oqytý, kıindirý sekildi san alýan máseleleri jetip artylatyn. Sodan nar táýekelge salyp, birden 10 bas iri qara satyp aldy. Tonnalap mal azyǵyn da daıyndap úlgerdi. Sabaqty ıne sátimen degendeı, isi alǵa basyp berdi. Mal basyn saqtap, ósiminen túsken paıdany shyp-shyrǵasyn shyǵarmaı kelisimshartta kórsetilgen kestege sáıkes, toqsan saıyn 114 myń teńgeden qorǵa quıyp otyr. Shyny kerek, «Bal ustaǵan barmaǵyn jalaıdy» degendeı, jemshóp satyp alý, ýaqtyly maldárigerlik qyzmet kórsetý sekildi qajettilikterden asqan qarajat otbasy keregin tolyq ótep otyr. Eń bastysy – «Bereke» baǵdarlamasy úıdiń berekesin kirgizdi. Úshtóbelik Qaırat Baekenovtiń osynaý ilkimdi isi aýyldastaryna ǵana emes óńir halqyna úlgi bolýda. Aýyldastary úlgi tutyp qana qoımaı, «Adamnyń istegenin adam isteıdi biz nege alǵa umtylyp «Bereke» baǵdarlamasymen berekemizdi kirgizbeımiz?» dep otyrǵanyn jasyryp qaıtemiz. – Basty maqsatymyz – aýyldy jerdegi kásipkerlikti damytý, – deıdi «Aýyl sharýashylyǵyn qarjylaı qoldaý qory» AQ Almaty oblystyq fılıalynyń dırektory Mádı Ibadýllaev. – Memlekettik saıasatqa saı eńbek etemin dep umtylǵan janǵa birinshi qajettiligi bolyp tabyla­tyn qarajat máselesin sheshýge kómektesemiz. Sóıtip, qoljetim­di ári tómengi paıyzben aýyl sharýashylyǵy salasyna shaǵyn nesıe beremiz. 2016 jyly «Bereke» baǵdarlamasynyń ustanymy naqtylanyp, Almaty oblysyna «Jumyspen qamtýdyń jol kartasy-2020»-nyń ekinshi baǵyty boıyn­sha qarastyrylǵan 2,9 mlrd teńgeniń 80 paıyzynan astamy mal bordaqylaý salasyna bólindi. Fılıal 150 alań­dy qarjylandyrýdy josparlap, bıyl 857 otbasylyq mal bordaqylaý alańyn ashýǵa 2,8 mlrd teńge bóldi. Agrarly oblys turǵyndarynyń negizgi kúnkóris kózi mal baǵyp, jer ónimderin ósirý bolyp sanalady. Tek uqsata bilgen durys. Bul rette qońy taıǵan maldy arzan baǵaǵa satyp alyp, bordaqylap satýdyń paıdasy mol. Saralaı bilgen adam taza eńbektiń óteýin kóredi. «Bereke» baǵdarlamasy aıasynda qoljetimdi ári tómengi paıyzben nesıe alǵan azamattar, otbasylaryn asyrap, aýyldastaryna jumys ornyn ashady, saýda núktelerine et tapsyrady. Memleketke tıisti salyq tólenetini óz aldyna. Otbasylyq shaǵyn ǵana mal bordaqylaý alańy birtindep ulǵaıady. Aýqymy úlkeıgen saıyn jaýapkershiligi de artady. Memleket tarapynan mundaı sharýashylyqtardy koo­peratıvterge biriktirý jumystary da qolǵa alyndy, al koo­peratıvtiń múm­kindikteri budan da kóp. Shaǵyn bor­da­qylaý alań­darynyń kóbeıýi nátıjesinde ekologııa­lyq taza ónimdi jergilikti saýda oryndaryna jetkizetin kásip­ker­lermen qatar, eksportqa shyǵarýǵa ózindik úles qosýshylar anyq­talyp, irikteletini taǵy bar.  Álııa EŃSEBAEVA Almaty oblysy