Lısakov qalasynyń irgesindegi Oktıabr kentine kógildir otyn keldi. Ol «QazTransGaz» AQ ulttyq operatorynyń «Qostanaı oblysynyń eldi-mekenderin gazdandyrý jáne gaz taratý jelilerin jańǵyrtý» ınvestısııalyq jobasy aıasynda kentke jetkizýshi jáne kóshearalyq gaz qubyrlarynyń qurylysyn bitirýdiń arqasynda múmkin boldy. Oktıabr kentin gazdandyrý úshin munda 3,5 km jetkizýshi jáne 36 km kóshearalyq qubyr salyndy.
Eldi-mekende 4 000 astam adam turady. 35 kóp qabatty jáne 700 jeke turǵyn úı gazǵa qosylýǵa ázir. Sonymen qatar 36 kommýnaldyq-turmystyq jáne áleýmettik nysandy gazben úzdiksiz qamtamasyz etýge múmkindik bar. Gaz qubyryn iske qosý saltanatynda oblys ákimi Arhımed Muhambetov óńir urǵyndarynyń ál-aýqatyn jaqsartýǵa yqpal etetin kóptegen jobalardyń júzege asyrylǵandyǵyn aıtty.
«Sonyń ishinde «QazTransGaz» Ulttyq operatory jáne «QazMunaıGaz» ulttyq kompanııasymen bizdiń oblysymyzdyń eldi mekenderin gazdandyrý boıynsha yntymaqtastyq týraly memorandýmǵa qol qoıylýy edi. Oktıabr kentin gazben jabdyqtaý bul eldi mekenniń odan arǵy damýyna oń yqpal jasaıdy, onyń turǵyndarynyń ómir súrý sapasyn aıtarlyqtaı kóteredi jáne jańa kásiporyndar ashý úshin túrtki bolady» dedi Arhımed Begejanuly.
«Kógildir otyny» laýlap turǵan aýyldarǵa qyzyǵa qaraıtynbyz. Ondaǵy turǵyndar kómir tasyp, aǵash jarý degendi áldeqashan umytqan. Osyndaı qýanyshty jańalyq bizge de jetti. Bizdiń óńirdegi aıaz barshaǵa aıan. Endi gaz qosylǵannan keıin bizdiń úıimizde de qysy-jazy jaılylyq pen jylý bolady» dedi kent turǵyny Mejamal Nurseıitova.
«QazTransGaz» AQ Bas dırektorynyń birinshi orynbasary Ǵalym Aıdosov bastalǵan ınvestısııalyq joba boıynsha oblystyń búkil eldi-mekenderi gazdandyrylatynyn aıtty. Bul jobalardy 2016-2017 jyldarǵy uzaq merzimdi ınvestısııalyq baǵdarlama sheńberinde júzege asyrýdy kózdep otyr.
Názıra Járimbetova
«Egemen Qazaqstan»