"Qazaqstan Ǵarysh Sapary" UK" AQ prezıdenti taǵaıyndaldy

Erǵazy Nurǵalıev "Qazaqstan Ǵarysh Sapary" UK" AQ-tyń prezıdenti bolyp taǵaıyndaldy, - dep habarlady Qazaqstan Respýblıkasynyń Qorǵanys jáne aeroǵarysh ónerkásibi mınıstrligi. "Qazaqstan Respýblıkasy Úkimetiniń kelisimi boıynsha "Qazaqstan Ǵarysh Sapary" UK" ulttyq kompanııasy" aksıonerlik qoǵamynyń prezıdenti bolyp Erǵazy Nurǵalıev saılandy", - delingen habarlamada. Erǵazy Nurǵalıev 1954 jyly 4 maýsym kúni Shyǵys Qazaqstan oblysynda dúnıege keldi. 1977 jyly "Sáýlet" mamandyǵy boıynsha О́skemen qurylys-jol ınstıtýtyn, 2001 jyly "Quqyqtaný" mamandyǵy boıynsha Máskeý halyqaralyq ekologııalyq-saıasattaný ýnıversıtetin támámdady. 1977 jyly qurylys áskeri leıtenanty ataǵymen jedel qyzmetti óteý úshin «Baıqońyr» ǵarysh aılaǵyna jiberildi. 1977-1979 jyldar aralyǵynda KSRO QM 130 qurylys bas basqarmasynyń bólimshelerinde áskerı boryshyn ótedi. "Baıqońyr" ǵarysh aılaǵynda "Proton", "Energııa-Boran" tasymaldaǵysh zymyrandarynyń starttyq jáne tehnıkalyq keshenderiniń qurylystarynda jumys istedi. 1979-1989 jyldar aralyǵynda ǵarysh aılaǵynyń kúrdeli jóndeý qurylysy basqarmasynda túrli ınjenerlik laýazymdardy atqardy. 1989 jyly Halyq depýtattarynyń lenındik qalalyq keńesiniń Atqarýshy komıteti tóraǵasynyń birinshi orynbasary bolyp taǵaıyndaldy. Lenınsk qalasynda alǵash qurylǵan ákimshiliktiń qurylymynda 1992-1995 jyldar aralyǵynda qalanyń bas sáýletshisi, Lenınsk qalasynyń Ákimshilik basshysynyń orynbasary, Memlekettik múlik jónindegi qalalyq aýmaqtyq komıtettiń tóraǵasy qyzmetterin atqardy. "Baıqońyr" ǵarysh keshenin jalǵa alý jaǵdaılarynda, 1995 jyly E.M. Nurǵalıev Qazaqstan Respýblıkasy Prezıdentiniń ókimimen "Baıqońyr" ǵarysh keshenindegi Qazaqstan Respýblıkasy Prezıdentiniń Arnaýly ókili bolyp taǵaıyndaldy, osy laýazymdy 2004 jylǵa deıin atqardy. 2005-2007 jyldar aralyǵynda "Báıterek" Qazaqstan-Reseı birlesken kásiporny» aksıonerlik qoǵamy Bas dırektorynyń birinshi orynbasary bolyp jumys istedi.2007-2014 jyldar aralyǵynda Qazaqstan Respýblıkasy Ulttyq ǵarysh agenttiginiń Jaýapty hatshysy laýazymyn atqardy. Qazaqstan Respýblıkasy Ulttyq ǵarysh agenttiginiń qaıta qurylýyna baılanysty, 2014 jyldyń tamyzynan bastap 2016 jyldyń qazanyna deıin Qazaqstan Respýblıkasy Investısııalar jáne damý mınıstrliginiń Aeroǵarysh komıteti tóraǵasynyń orynbasary laýazymyn, 2016 jyldyń qarashasynan bastap Qazaqstan Respýblıkasy Qorǵanys jáne aeroǵarysh ónerkásibi mınıstrliginiń Aeroǵarysh komıtetine osyndaı laýazymdy atqardy. "Baıqońyr" ǵarysh aılaǵynyń ardageri, E. Nurǵalıevke ǵarysh keshenin damytýǵa qosqan úlesi úshin 2011 jyly "Baıqońyr qalasynyń qurmetti azamaty", "Baıqońyr" ǵarysh aılaǵynyń eńbek sińirgen qurylysshysy" ataqtary berildi.