Gollıvýdtyń epıkalyq «Ben Gýr» kınolentasy bıylǵy jyldyń eń kóp shyǵyn ákelgen fılmderiniń tiziminde birinshi orynǵa shyqty. Fılmniń rejısseri – Tımýr Bekmambetov. Bul týraly The Hollywood Reporter basylymynyń reıtıngine silteme jasap lenta.ru habarlaıdy.
Sarapshylar esebi boıynsha, «Ben Gýrdy» túsirýge 110 mln dollar jumsalǵan, oǵan qosa marketıngke ketken qarjy bar. Álemdik kınoprokatta kartına 94,1 mln dollar jınap, búkil shyǵynnyń tek 43 paıyzyn japqan. Sóıtip, ınvestorlar bul jobadan 120 mln dollar shyǵyn shekken.
Tizimdegi ekinshi orynda ataqty rejısser Stıven Spılberg tur. Onyń «The BFG» fılmi (Meıirban dáý) shyǵynnyń 64 paıyzyn ǵana aqtaǵan, shyǵyn kólemi – 100 mln dollar.
Úshinshi orynda Aleks Proıastyń 90 mln dollar shyǵyn ákelgen «Mysyr qudaılary» fılmi.
Sátsiz fılmder qatarynda Robert Zemekıstiń Bred Pıtt oınaǵan «Odaqtastar» fılmi de bar.