Qazaqstan Syrtqy ister mınıstrliginiń quramymen kezdesken Memleket basshysy Nursultan Nazarbaev kadr saıasatynyń prınsıpterin túsindirdi. Bul týraly Aqordanyń Feısbýktegi paraqshasy habarlady.
«Jasy kelgen elshilerdiń bári qyzmetten bosatylatyn bolady. Olardyń ornyna jańa adamdar taǵaıyndalady. Elshilikterdegi kadr máselesin muqııat qaraýymyz qajet.
Reseı, AQSh, Qytaı, Germanııa, Fransııa sııaqty eldermen aradaǵy saýda-sattyqty damytýǵa, ınvestısııa tartýǵa kúsh salatyn ýákilderimiz bolýy kerek. Tek syrtqy saıasatpen aınalysamyz degen bolmaıdy. Biz AQSh, Qytaı sııaqty syrtqy saıasatta búkil álemge yqpal etip otyrǵan úlken el emespiz. Biz óz múmkindigimizge qaraı áreket etýimiz kerek.
Ekinshi jaǵynan, burynǵy kezderi bizde bilikti kadrlar jetispedi. Qazir Qudaıǵa shúkir, myqty mamandar ósip kele jatyr. Syrtqy ister mınıstrligi óz kadrlaryn qalyptastyrý kezeńin aıaqtap kele jatyr dep sanaımyn.
Sondyqtan bárińizge úlken jaýapkershilik túsedi. Qazir shet elderde júrgen keı elshilerimizge «Mınıstrlikke kelip departamentte biraz jumys iste» dese, ony mensingisi kelmeıdi. Bulaı bolmaıdy. Qaıda jumsaımyz sonda jumys istesin. Syrtqy ister mınıstrliginde áskerdegi sııaqty qatań tártip bolýy kerek. Mınıstrden bastap barlyǵyńyzǵa úlken jaýapkershilik artylady» dedi Elbasy.