Qazaqstannyń Fınlıandııadaǵy elshiliginiń jáne «Qazaqstandyq dıplomattardyń birlestigi» respýblıkalyq qoǵamdyq uıymynyń bastamasymen jańa 2017 jyldyń qarsańynda ózgeshe jańajyldyq qaıyrymdylyq aksııasy bastaldy.
Bul bastamanyń basty maqsaty – Qazaqstandaǵy Daýn sındromymen aýyratyn balalarǵa qoldaý kórsetý, qamqorlyq tanytý. «Santa Klaýstan sálem!» aksııasynyń aıasynda «Qazaqstandyq dıplomattardyń birlestigi» qoǵamdyq qorynyń ókilderi Astanadaǵy «Kún álemi» qoǵamdyq qoryna týabitti dertke shaldyqqan búldirshinderge arnalǵan san túrli qyzyldy-jasyldy oıynshyqtardy tabys etti.
«Mundaı is-sharalar balalardyń densaýlyqtary men kóńil-kúılerine oń áserin tıgizedi, olarǵa erekshe áser syılap, syrtqy álemdi kóbirek tanyp-bilýlerine múmkindik beredi dep oılaımyz. Bul dúnıede sábıdiń myqty densaýlyǵynan, onyń bal-bul janǵan júzin kórýden, kúlkisin estýden artyq qandaı baqyt bar?! Bul aksııa atalǵan sındrommen aýyratyn balalarǵa qoǵamnyń nazaryn aýdartýdy, olardyń eldiń ómirine belsendi aralasýy men beıimdelýine qolushyn sozýdy kózdeıdi. Sonymen qatar, ol damýynda ózgesheligi bar balalardy qoldaý men qorǵaýǵa baǵyttalǵan ıgi dástúrdiń budan ári de jalǵasyn tabýyna, Qazaqstan men Fınlıandııa arasyndaǵy yntymaqtastyqtyń mádenı-gýmanıtarlyq tetiginiń bekýine sep bolmaq», dedi «Qazaqstandyq dıplomattar birlestigi» qoǵamdyq qorynyń ókili Janat Shakeev.
Al «Kún álemi» qoǵamdyq qorynyń prezıdenti Evgenııa Chebotarevskaıa ońaltý ortalyǵynyń ereksheligine toqtaldy. «Kún álemi» ońaltý ortalyǵynyń negiziniń qalanýyna Daýn sındromymen dúnıege kelgen balalardyń ata-analarynyń ózderi yqpal etti. Alǵashynda ol «Kún álemi» qoǵamdyq qory retinde quryldy. Bir jyldan keıin, mine, osyndaı ortalyq ashyldy. Jalpy, elordada mundaı dertke shaldyqqan 300-ge tarta bala bar. Bul jerge 3 aı ishinde 30-ǵa tarta sábıdi, al jylyna shamamen 120-ǵa jýyq balany qabyldaıtyn múmkindigimiz bar. Bizdiń ortalyqty «Asyl bala» respýblıkalyq assosıasııasy qarjylandyrady. Sondaı-aq, Qazaqstandaǵy Bala quqyqtary jónindegi ýákil Zaǵıpa Balıevanyń ózi qoldaý kórsetedi», deıdi «Kún álemi» qoǵamdyq qorynyń prezıdenti.
Láıla EDILQYZY,
«Egemen Qazaqstan»