Qazaq jetim, jesirin jylatpaǵan. Aqtóbe oblysy IID qoldaýymen jańa jyl qarsańynda qyzmettik mindetterin atqarý kezinde erlikpen qaza tapqan qyzmetkerlerdiń otbasyna 1 mıllıon teńge kóleminde aqshalaı kómek kórsetildi.
El tynyshtyǵyn, azamattardyń qaýipsizdigin qorǵaý jolynda ar-namystaryn joǵary ustap, qyzmettik mindetterin adal atqaryp, óz ómirlerin qıyp, keler urpaqqa úlgi bolǵan asyl azamattar esh ýaqytta umytylmaıdy. 1991 jyldan beri Aqtóbe oblysy IID-de 9 polısııa qyzmetkeri qyzmettik mindetterin atqarý kezinde erlikpen qaza tapqan. Olardyń qatarynda: Aısa Kartov, Amangeldi Qosjanov, Abbat Nurymjanov, Alpysbaı Nurlan, Aıdos Býranbaev, Rýslan Joldybaev, Rústem Kenjalın jáne Temirbek Jaqsylyqbaev bar.
Aqtóbe oblysy IID jeke quramy Qazaqstan Respýblıkasynyń 25 jyldyq mereıtoıyna oraı qyzmettik mindetterin atqarý kezinde qaza bolǵan qyzmetkerler otbasyna 100 000 teńge mólsherinde áleýmettik kómek kórsetse, Jańa jyl qarsańynda 1 000 000 teńgeden aýdardy. Departamentte ótken merekelik is-shara barysynda 2002 jyly Qarǵaly aýdanynda qylmyskerlerdi quryqtaý kezinde qaza tapqan Abat Nurymjanovtyń jesiri Marına Nurymjanova kózine jas alyp turyp, alǵysyn bildirdi:
«Joldasym Abat sol kezde Qarǵaly aýdandyq ishki ister bólimi bastyǵynyń jedel jumys boıynsha orynbasary boldy. Eki qylmyskerdi qylmystary ústinde ustamaq bolǵan kezde qapyda qaza tapty. Aqtóbe oblysy IID bizdi qamqorlyqsyz qaldyrǵan joq. Asyraýshymyzdan aıyrylǵan soń meni qyzmetke qabyldap, joldasymnyń isin jalǵastyrdym. Búginde polısııa kapıtany sheninde qyzmet atqaryp otyrmyn. Moraldyq jáne materıaldyq kómekterin aıap jatqan joq. Men eń aldymen IID bastyǵy Mahambet Abısatov pen áriptesterime aıryqsha rızashylyǵymdy bildirgim keledi. Jańa jyl aldynda berilgen bul qomaqty soma kóptegen áleýmettik máselelerimizdi sheshýge kómek boldy, ásirese, kishi qyzym Lılııa qatty qýandy, ol osy qarajattan Orynbor qalasyna baryp kózine operasııa jasatpaqshy», – dedi.
Mine, osyndaı saýapty is kópke ónege dep sanaımyz.
Laýra ZABIHOVA,
jýrnalıst
AQTО́BE