Otyrar aýdandyq gazetiniń bas redaktory Tópen aǵamyz birde qyzmettik kóligimen Shymkent qalasyna kelip, kóshe qıylysynan durys burylmaı, MAI qyzmetkerine ustalypty. Kólikten túsip jón surasa, ala taıaqty jigit araaǵaıyndyqqa kónbeıtin kórinedi.
Sóıtse Tópekeń:
– Áı, aınalaıyn, osy Shymkentte qansha «povorot» bolsa, sonyń árqaısysyna 500 teńgeden bereıin, – depti.
MAI qyzmetkeri:
– Oı, kóke, ózińiz aýzyńyzdan qaǵynyp tursyz... Shymkentte ne kóp, «povorot» kóp qoı. Onyń bárine 500 teńgeden berýge shashyńyz jetpeıdi. Odan da on-on bes «povorottyń» aqshasyn tastap kete berińiz...
Sonda Tópen aǵa:
– Joq, aınalaıyn... Shymkentte eki-aq «povorot» bar. Bireýi – ońǵa, bireýi – solǵa... Basqa «povorot» kórip turǵanym joq, – dep «maıshnıktiń» qolyna myń teńge ustatyp ketken eken.