Elimizde táýelsizdiktiń týy endi jelbirep, teńgeniń jańa aýysqan kezi eken. Sol jylǵy kóktemde Sháýildirge bir tamshy jaýyn tambaı, el qatty sasypty. Aqyrynda aýyldyń aqsaqaldary «tasattyq bereıik» degen toqtamǵa keledi. Tasattyq – Alla taǵaladan jańbyr surap jalbarynatyn, qurbandyqqa bir mal shalatyn qudaıy tamaq qoı.
Tasattyq berýge kelisken el aqsha jınaýǵa kelgende biraz daýlasypty. Aqshasy barlar 5 teńgeden jınaǵysy keledi, turmysy tómender 3 teńgeden bergisi keledi. Aýyldaǵylar ári-beri «aıtysyp», aqyrynda 3 teńgeden jınaýǵa kelisedi.
Aqshany jınap, kerek-jaraǵynyń bárin alyp, maldy soıyp, aýyldyń qasyndaǵy qyrdyń basynda tasattyq beriledi. Allanyń qudireti, Quran oqylyp, tamaqty jep, jurt «áýmın» dep bet sıpap bola bergende kún kúrkirep, jaýyn bastalady. Jurt japa-tarmaǵaı zattaryn jınap, etektegi aýylǵa qaraı jónelipti. Jańbyr birte-birte kúsheıip, saı-salanyń bári sel bolyp aǵady.
Sonda zatyn kóterip alyp, úıine qaraı zytyp bara jatqan Tópen degen aǵamyz «Oıbaı, 3 teńgeden jınaǵanda mundaı boldy, 5 teńgeden jınaǵanda «voobshe» bitedi ekenbiz ǵoı», dese kerek.
Oralhan DÁÝIT,
«Egemen Qazaqstan»