Bıylǵy jylǵy qazaq poezııasy óziniń jańa dáýirleý kezeńindegi eki alybynyń mereıtoılarymen erekshelenip otyr. «Bárinen de Qasymnyń desi basym», dep sóz óneriniń has talantyna bas ıgen Muqaǵalı Maqataevtyń 80 jyldyǵy Alataý baýraıyndaǵy Qarasazda dúbirlep ótse, ustazdyǵyn pir tutqan Qasym Amanjolovtyń 100 jyldyǵy erteń Qaraǵandyda bastalyp, Qarqaralyda jalǵasady. Osyǵan baılanysty is-sharalar baǵdarlamasy san alýan. Solardyń bir parasy mynadaı.
*8 qyrkúıekte Q.Amanjolov ánderi men óleńderine jazylǵan ánder festıvali ashylyp, mereıtoı ıesi týraly beınefılmniń kórsetilimi bolady. Sodan soń aqyndar aıtysy ótip, «Dosymnyń úılenýi» spektakli qoıylady.
*9 qyrkúıekte Qaraǵandy oblysynyń ákimi S.Ahmetov ádebıet jáne óner qaıratkerlerimen kezdesip, sodan keıin Q.Amanjolov eskertkishiniń ashylý saltanaty bolady. Osy kúni merekelik ǵylymı-tájirıbelik konferensııa men jazba aqyndar jyr-músháırasy ótedi.
*10 qyrkúıekte Qarqaralyda Qunanbaı meshitine minájat jasalyp, aýdan ortalyǵyndaǵy ortalyqtandyrylǵan kitaphanaǵa aqyn esimin berý rásimi ótedi. Osydan keıin mereıtoıdyń saltanatty ashylýy bolyp, óner juldyzdary konsert qoıady. Alaman báıge ótedi.