Senator Manap Kóbenov Pavlodar oblysyndaǵy Aqtoǵaı aýdanynda boldy. Aýdan ákimi Aǵybaı Ámirınmen kezdesýde aımaqtyń áleýmettik-ekonomıkalyq damýyndaǵy basymdyqqa ıe máseleler talqylandy.
Atap aıtqanda, Aqtoǵaı aýylyndaǵy ár úıdi aýyz sýmen qamtamasyz etetin sý qubyry qurylysynyń II kezeńin iske asyrý keleshegi qaraldy. 2017 jyly bul baǵdarlamany iske asyrýǵa respýblıkalyq bıýdjetten 930 mıllıon teńge bólý kózdelip otyr.
Depýtat Aqtoǵaı aýylyndaǵy balalardyń óner mektebiniń jumysymen tanysyp, Aqtoǵaı aýdanynyń qurmetti azamaty Jasulan Shormanov basqaratyn «Aýyldastar» klýbynyń ardagerlerimen áńgimelesti.
Taıaý kúnderi M.Kóbenov Ekibastuz jáne Aqsý qalalaryna, sondaı-aq, Pavlodar oblysyndaǵy birqatar aýdandarǵa barýdy josparlap otyr.
Farıda BYQAI,
«Egemen Qazaqstan»
Pavlodar oblysy
* * *
Senat depýtattary Murat Baqtııaruly men Bekmyrza Elamanov aımaqtarǵa saparlary aıasynda Qyzylorda oblysynda boldy. Senatorlar Jalaǵash aýdanynyń áleýmettik-ekonomıkalyq damý barysymen tanysty.
Jergilikti halyqpen kezdesýler barysynda aýdan ortalyǵyndaǵy ınfraqurylymdy damytý jáne «Nurly jer» baǵdarlamasy boıynsha bólingen 420 mıllıon teńgeniń ıgerilýi týraly máseleler kóterildi.
Depýtattar osy aýdandaǵy mııa tamyryn óńdeý zaýytynda bolyp, eńbek ujymymen kezdesti. Qazirgi kezde elý shaqty adam jumys isteıtin mııa tamyryn óńdeý zaýyty ónimderiniń edáýir bóligi shet elge eksportqa shyǵarylady.
M.Baqtııaruly men B.Elamanov Syrdarııa aýdanynda bolǵan kezderinde Qaljan ahýn aýylyndaǵy kúrishshilermen kezdesti. Júzdesý barysynda eńbek ónimdiligin arttyrý, tyńaıtqyshtar men janar-jaǵar maı máseleleri týraly áńgime qozǵaldy.
Syrdarııa aýdanyndaǵy mektepte bolǵan kezdesýde Memleket basshysynyń bes ınstıtýttyq reformasyn júzege asyrý jónindegi «100 naqty qadam» Ult josparyn iske asyrý jáne úsh tuǵyrly tildi damytý jaıynda áńgime boldy.
Erjan BAITILES,
«Egemen Qazaqstan»
Qyzylorda oblysy
***
Parlament Senaty depýtattarynyń aımaqtarǵa sapary odan ári jalǵasýda. Bul kúnderi senator Marat Taǵymov Aqtóbe oblysynda jumys babyndaǵy saparda júr.
Depýtat oblys ortalyǵy men Alǵa aýdanynda jergilikti máslıhat depýtattarymen jáne jurtshylyqpen kezdesýler ótkizdi. M.Taǵymov «Aıbek» qalbyrlaý zaýytynda jáne Aqtóbedegi qalalyq jylyjaı sharýashylyǵynda da boldy. Alǵa aýdanyndaǵy «Nurly jol» baǵdarlamasy boıynsha qarjylandyrylǵan et óńdeý kesheni men «Alǵa jylý» KMK tazartý ǵımaratynyń jumysymen tanysty, sondaı-aq, quqyq qorǵaý organdarynyń basshylyǵymen kezdesti. Eńbek ujymdarymen júzdesý barysynda aımaqtyń ekonomıkalyq órkendeýi men áleýmettik máselelerdi sheshý týraly áńgime órbidi.
Senator aldaǵy ýaqytta Mártók jáne Áıteke bı aýdandaryna barýdy josparlap otyr.
Satybaldy SÁÝIRBAI,
«Egemen Qazaqstan»
Aqtóbe oblysy
* * *
Senat depýtattary aımaqtardyń áleýmettik-ekonomıkalyq damý barysymen tanysýda. Almaty oblysynda saparda júrgen senatorlar Nurlan Qylyshbaev pen Ańsar Musahanov Qapshaǵaı qalasynda, Sheńgeldi jáne Zarechnyı aýyldyq okrýgterinde birqatar kezdesýler ótkizdi.
Depýtattar «Agrıpak» orama-qaptama ónimderin óndiretin sehynda, «Raýan» sharýa qojalyǵynda, «Balyq óndirisi», «Grın Lend Alataý», «Mareven Fýd Tıan-Shan» mekemelerinde boldy. Sondaı-aq, «Nurly jol» baǵdarlamasy boıynsha Zarechnyı aýyldyq ákimdiginde salynǵan bý qazandyǵynyń jumysymen tanysty.
Senatorlar Balqash aýdanynda «Dinara-Ranch» jáne «О́tesBıoAzııa» agrofırmalarynyń eńbek ujymdarymen, sonymen qatar, aýdandyq qoǵamdyq keńes pen jergilikti polısııa basshylyǵymen kezdesti. Júzdesýler barysynda N.Qylyshbaev pen A.Musahanov saılaýshylardy bes ınstıtýttyq reforma men «100 naqty qadam» Ult josparyn iske asyrýǵa arnalyp Parlamentte qabyldanǵan zańdar týraly habardar etti.
Nurbol ÁLDIBAEV,
«Egemen Qazaqstan»
Almaty oblysy
***
Aqmola óńirine kezekti saparmen kelgen Parlament Májilisiniń depýtattary Sapar Ahmetov, Ersultan Bekturǵanov, Janat Jarasov, Jeksenbaı Dúısebaev jáne Mıhaıl Chırkov óz kezdesýlerin oblystyq «Nur Otan» partııasy aktıvinen bastady.
Buqaramen kezdesý barysynda Elbasynyń saıasatyn júzege asyrýdaǵy negizgi atqarylǵan jumystaryna esep, qoıylǵan suraqtarǵa jaýap berdi. Partııa aktıvimen ótken kezdesýden soń, depýtattar «Sınegorıa» Kókshetaý sút zaýytynyń jumysymen tanysty. Sút óndirisi barysynda qoldanylatyn zamanaýı tehnologııalardy kórip, sút ónimderine joǵary baǵa berdi.
Budan ári Májilis depýtattary oblys ortalyǵynda ornalasqan Ishki ister mınıstrligine qarasty Kókshetaý tehnıkalyq ınstıtýtynyń oqytýshy-professorlyq quramymen jáne kýrsanttarmen kezdesip, olardyń materıaldyq-tehnıkalyq bazasymen tanysty. Búgingi tańda joǵary oqý orny qabyrǵasynda 600 kýrsant bilim alyp jatyr, olardyń ishinde Reseı men Belarýs memleketteriniń azamattary da bar. Bolashaq órt sóndirýshi mamandar tolyǵymen memleket qaramaǵynda.
Sonymen qatar, depýtattar Jeksenbaı Dúısebaev pen Sapar Ahmetov «Nur Otan» partııasynyń Aqmola oblystyq fılıalynda qoǵamdyq qabyldaý ótkizip, turǵyndardyń suraqtary men máselelerin qarady.
Baqbergen AMALBEK,
«Egemen Qazaqstan»
Aqmola oblysy