Almaty qalasyndaǵy 28-shi qysqy ýnıversıadada qazaqstandyq frıstaılshylar aralas komandalyq akrobatıkadan Janbota Aldabergenova men Baǵlan Ińkárbek altynnan alqa taqty. Qos jerlesimiz sýperfınal oıynynda eki qytaılyq komandany artqa tastap, el qorjynyna altyn medal saldy. Olar eki talpynystan keıin, 167. 05 kórsetkishimen qytaılyq sportshylardy shań qaptyryp ketti.
Bul jeńis Ońtústik Qazaqstan sporty tarıhynda eleýli oqıǵaǵa balanyp otyr. О́ıtkeni qysy jyp-jyly, qar sırek jaýatyn Ońtústik Qazaqstan oblysynan dúnıejúzilik qysqy ýnıversıadada 3 birdeı jerlesimiz júldeger atandy.
Altynnan alqa taqqan jerlesterimizdi oblys ákimi Janseıit Túımebaev arnaıy quttyqtap, jyly lebizin bildirdi.
«Qysqy Ýnıversıada Qazaqstan úshin sátti bastaldy. Jarystyń alǵashqy kúninde-aq frıstaıldyń akrobatıka túri boıynsha synǵa túsken Jibek Arapbaeva Qazaqstan qorjynyna kúmis salsa, Janbota Aldabergenova qola medal enshiledi. Bul tarıhı jetistikke búkil Alash halqy men Ońtústik jurty da erekshe qýandy. Mine, araǵa eki kún salyp, eki qarakózimiz komandalyq esepte altynnan alqa taǵyp otyr. Jeńisti jemisti kúnderimiz kóp bolsyn. Sportshylarymyzǵa aldaǵy syndarda sáttilik serik bolǵaı», - dedi Janseıit Qanseıituly.
28-shi Dúnıejúzilik qysqy ýnıversıadaǵa 1700-den astam sportshy men 1 000-ǵa tarta resmı ókil qatysyp jatyr. Júlde úshin álemniń 578 ýnıversıtetiniń sportshylary baq synaýda. Aıta keteıik, Almatyda ótip jatqan Ýnıversıadada Qazaqstan qorjyny eki altyn, eki kúmis jáne 4 qola medalmen tolyqty.