Otandyq ǵalymdar bıdaı men arpanyń qýańshylyqqa tózimdi surpyn ósirýdi oılastyryp jatyr.
Olar Avstralııa aýyl sharýashylyǵynyń ozyq tásilin engizbek. Sondaı-aq, Sáken Seıfýllın atyndaǵy qazaq agrotehnıkalyq ýnıversıtetiniń mamandary kartopqa túsetin qozdyrǵyshtyń túrlerin anyqtaýdy qolǵa alǵan.
Elimizdegi aýyl sharýashylyǵy salasynyń mamandary bıdaıdyń bir sortyn shyǵarýǵa ondaǵan tipti 20 jylyn sarp etedi eken. Bul merzimdi qysqartýdyń tıimdi jolyn kóktemnen bastap júzege asyrmaq. Álemniń men degen aýyl sharýashylyq ýnıversıtetinen tájirıbe alǵan sala mamandary dándi-daqyldardyń birneshe túrine taldaý júrgizgen.
"Soltústik Qazaqstannyń qýań klımattyq aýdandaryna arnalǵan qurǵaqshylyqqa shydamdy, ónimdiligi joǵary suryptardy shyǵarý - bizdiń maqsatymyz. Otandyq seleksıonerlerge járdemdesý", - deıdi eginshilik jáne dıhanshylyq kafedrasynyń aǵa oqytýshysy Satybaldy Jotaev.
Dándi daqyldardyń ónimdiligi jaqsy bolý úshin oǵan túsken vırýstyq dertti erte anyqtaý mańyzdy. Osy turǵyda ýnıversıtet ǵalymdary elimizdiń ár óńirinde ósiriletin kartopta kezdesetin aýrý túrlerin anyqtap, arnaıy bank qurǵan.
"Kartoptyń vırýstyq aýrýlaryn anyqtaıtyn dıagnostıkalyq test júrgizemiz. Buryndary sheteldiń tásildi qoldanatynbyz. Qazir otandyq dıagnostıkalyq testi paıdalanamyz. Osy arqyly kartoptyń japyraǵyna, tamyryna nemese ónimine túsken dertti anyqtaı alamyz. Bul degenimiz ónimdiliktiń artýyna kepildik beredi", - deıdi karantındik ósimdikter kafedrasynyń oqytýshysy Vadım Hasanov.