Almatydaǵy Dostyq úıinde Qazaqstan halqy Assambleıasynyń uıymdastyrýymen Prezıdent Nursultan Nazarbaevtyń Qazaqstan halqyna Úndeýin talqylaý maqsatynda jınalys ótti. Oǵan Qazaqstan halqy Assambleıasynyń músheleri, respýblıkalyq jáne qalalyq etnomádenı birlestikterdiń jetekshileri men ókilderi qatysty.
Qazaqstan halqy Assambleıasy Tóraǵasynyń orynbasary Leonıd Pıtalenko moderatorlyq etken otyrysta «Barbang» kúrdter qaýymdastyǵynyń jetekshisi Knıaz Mırzoev, Almaty qalalyq Qazaqstan halqy Assambleıasynyń jetekshisi Qazbek Mamsýrov, «Ahyska» túrik birlestigi jetekshisiniń orynbasary Shahısmaıl Asıev, Almaty qalalyq Koreı ulttyq birlestigi basshysynyń orynbasary Georgıı Kan jáne Almaty qalalyq máslıhatynyń depýtaty Nýrııa Nııazova sóz sóılep, Úndeýdiń ár bólimine jeke-jeke toqtaldy. Sóz alǵan barlyq qatysýshy Úndeýdiń Qazaqstandaǵy barlyq ult ókilderi úshin mańyzdy ekenin atap kórsetti.
Knıaz Mırzoev: «Biz Elbasynyń Úndeýin talqylaý úshin emes, taldaý úshin jınalyp otyrmyz. Sebebi, bul – bizge deıin de jeti ret ólshenip, bir ret kesilgen, tyńǵylyqty oılastyryp baryp shyǵarylǵan sheshim. Bizdiń mindetimiz qarapaıym halyqqa jan-jaqty túsindirip Qazaqstan halqy Assambleıasynyń atynan qoldaý bildirý», – dedi.
«Biz – úlken bir otbasynyń múshelerimiz, – dedi Qazaqstan halqy Assambleıasy Tóraǵasynyń orynbasary Leonıd Pıtalenko. – Táýelsizdik alǵan 25 jyldyń ishinde tatýlyǵymyzǵa syzat túsirmeı, qandaı syn saǵatta da birligimizden ajyramaı kele jatyrmyz. Sonyń arqasynda ishki, syrtqy saıasaty myǵym memleket qura bildik. Demek, Elbasynyń bul sheshimi de jalpy halyq tarapynan biraýyzdan qoldaý tabatyny sózsiz. Álem ózgerip jatyr, jańa zaman bizdiń damyp kele jatqan jas memleketimizden jańa qadamdar, batyl sheshimder talap etedi. Bul reformanyń maqsaty da búgingi ýaqyt suranysyna jaýap berý».
Leonıd Nıkolaevıch jıyn sońynda Úndeýdi biraýyzdan qoldaı otyryp, usynystar men tilek-talaptar bolsa eskeriletinin, sonyń negizinde Qazaqstan halqy Assambleıasy atynan qaýly qabyldanatynyn eskertti.
Almas NÚSIP,
«Egemen Qazaqstan»
Almaty