Elbasy Nursultan Nazarbaevtyń Qazaqstan halqyna kezekti Joldaýy elimizdi ekonomıkalyq turǵydan damytýdy jalǵastyrý máselesine arnaldy. Bul – búgingi kúnniń ózekti máselesi. О́ıtkeni, sońǵy jyldardaǵy «sanksııalar soǵysy» sııaqty keleńsiz áserlerdiń saldarynan energetıkalyq resýrstardyń baǵasy quldyrap, ekonomıkanyń ósýi birshama baıaýlaǵan edi. Endi, mine, Elbasy osyndaı keleńsizdikterdi eńserý joldaryn kórsetip berdi. Sonyń ishinde IT tehnologııalardy óndiriske engizý arqyly eńbek ónimdiligin arttyryp, joǵary kórsetkishterge qol jetkizýge bolatyny atap aıtyldy. Bul buryn da aıtylyp júrgen máseleler bolǵanymen, endi solar jańa kúshpen, jańa bastamashylyqpen qolǵa alynar degen úmit bar.
Sonymen qatar, Elbasy qorǵanys pen qaýipsizdik máselesin nyǵaıtý kerektigin de atap ótti. Túrli qaterlerge qarsy áreket etetin áleýetti kúshterimizdi damytý men qorǵanys qabiletimizdi arttyrý eshqashan da Elbasynyń nazarynan tys qalǵan emes.
Elbasy «Qazaqstan-2050» damý strategııasyn qaıta jańǵyrtyp, oǵan tyń serpin berý kerektigin de Úkimetke júktep otyr. Aldyńǵy qatarly damyǵan 30 eldiń qataryna ený jospary da jańǵyrtylyp, ony jańa kúshpen ilgeriletý mindeti de aıtyldy. Prezıdenttiń sózindegi ózime qatty áser etken nárselerdiń qatarynda aǵylshyn tilin meńgerýdiń tyń serpin alatyndyǵy boldy. Elbasy joǵary synyp oqýshylary aǵylshyn tilin erkin meńgerip, onymen taza sóıleıtin dárejege jetýi kerektigin alǵa tartty. Barlyq ekonomıkalyq jańalyqtar, ozyq tájirıbeler men jańashyldyqtar osy tilde bolǵandyqtan, ony orys tilinen aýdarmaı birden uǵý – qazirgi jastardyń aldyna mindet etip qoıylyp otyr.
Menińshe, bul oryndy talap, óıtkeni, qazir búkil álem bir-birimen aǵylshyn tilinde sóılesedi.
Abaı TASBOLATOV,
Parlament Májilisiniń depýtaty