Kásipkerlerdiń eń kóp shaǵymdanatyn jáne quqyq qorǵaý baǵyty aıasynda eń jıi túsetin ótinishter jer qatynastary, sáýlet jáne qurylys, memlekettik satyp alýǵa baılanysty, dep jazady abctv.kz.
«Oblystyq kásipkerler palatasy júrgizgen saraptama qorytyndysy boıynsha, kásipkerlerdiń eń kóp shaǵymdanatyn jáne quqyq qorǵaý baǵyty aıasynda eń jıi túsetin ótinishter jer qatynastary, sáýlet jáne qurylys, memlekettik satyp alýǵa baılanysty. Buǵan tek zańdaǵy olqylyqtar ǵana emes, kóp jaǵdaıda basqarma ne bólim mamandarynyń sala boıynsha habarsyz bolyp shyǵýy, normatıvti-quqyqtyq aktilerdi bilmeýinen nemese ádep kodeksin saqtamaýynan týyndap jatady. Qaǵazbastylyqtyń, jemqorlyqtyń paıda bolýy da osydan», – deıdi Almaty oblystyq kásipkerler palatasynyń dırektory Lázzat Shyńǵysbaeva.
Bıyl Almaty oblysy boıynsha 7 myńnan astam memlekettik qyzmetshi test tapsyrady. Bilimi men biliktiligi sarapqa túsetin synaq jaıy prezıdenttiń «Ult josparyndaǵy» basym baǵyttarynyń biri – kásibı memlekettik apparatty qurý bastamasynda aıtylǵan bolatyn.
Synaq tek memlekettik qyzmetshiler úshin mańyzdy ǵana emes, memlekettik qyzmet túrlerin alýshylar úshin de ózekti. О́ıtkeni, kásipkerlerdiń kúndelikti jumysy jergilikti atqarýshy bılikpen, memlekettik organdarmen tyǵyz baılanysty. Kásipti ashý, keńeıtý, tipti jabý úshin de ruqsat qaǵazdar, tıisti qujattar memlekettik organdardan alynady. Olardyń kásibıligi saýaldyń tez arada, oń nátıjemen sheshilýine yqpal etedi.
Memleket basshysynyń bıyl jarııalaǵan joldaýynda tabystalǵan mindetterdi iske asyrýda jergilikti ákimdikterdiń orny men bızneske degen qarym-qatynasy saralanady. Tipti, arnaıy reıtıng ázirlenip, ákimder jumysyn baǵalaýdyń bir krıterııi retinde bızneske kórsetken qoldaý retinde anyqtaý júkteldi. Osy sebepti jetisýlyqtar memlekettik qyzmetkerlerge arnalǵan keshendi attestasııa aldaǵy ýaqytta kásibı, saýatty apparattyń qurylýyna septigin tıgizedi degen oıda.