Búgin Astana ýaqytymen tańǵy saǵat 09:00-de London qor bırjasynda Brent markaly munaı quny keshegi sessııamen salystyrǵanda 1,05 dollarǵa qymbattap, 56,60 dollarǵa saýdalandy, dep jazady investing.
Munaı baǵasynyń qymbattaýyna túrtki bolǵan OPEK elderiniń óndiristi azaıtý týraly kelisiminiń óz ýaqytymen oryndalýy. Qazirgi tańda uıym músheleri josparly kórsetkishtiń 83 paıyzyn oryndap, naryqtaǵy eksport kólemin aıtarlyqtaı qysqartty.
Al búgin túnde AQSh Federaldy qorynyń bıylǵy jylǵy alǵashqy otyrysy ótip, onda dollardyń paıyzdyq ústemeaqysy ózgerissiz 0,75 paıyz deńgeıinde qaldy. Buny Federaldy qor basshysy Djannet Iellen AQSh ekonomıkasynyń artýy, eldegi jumyssyzdyq azaıýymen baılanystyrdy. Iellenniń osy sózinen keıin dollardyń ózge valıýtalarǵa shaqqandaǵy baǵamy kóterile tústi.
Al búgin KASE-niń tańǵy sessııasynda bir AQSh dollary 324,78 teńgege teńesti. Dollardyń kóterilgenimen, teńge baǵamynyń túspeýi munaı baǵasynyń kóterilgenimen baılanysty bolsa kerek.