Qazaqstan halqyna jáne Prezıdentine Ulttyq bank tóraǵasy D.Aqyshev, Joǵarǵy Sot keńesiniń tóraǵasy A.Smolın, Bas prokýror J.Asanov, «Syrbar» syrtqy barlaý qyzmetiniń dırektory Ǵ.Baıjanov, sondaı-aq Prezıdent Ákimshiliginiń basshylyq laýazymdaǵy birqatar tulǵalary, Úkimet músheleri, oblystardyń jáne Almaty qalasynyń ákimi saltanatty túrde ant berdi.
Qazaqstan Prezıdenti memlekettik qyzmetshilerge qoıylatyn talap arta túsetinin atap ótti.
"Bıýdjet qarajatyn tıimsiz paıdalaný jaǵdaılary jıi kezdesip jatady. Memlekettik qyzmetshiler tarapynan bolatyn quqyq buzý jaıttary memlekettik qyzmettiń ǵana ımıdjine emes, jalpy memlekettik basqarý júıesine teris áserin tıgizedi", – dedi Memleket basshysy.
Sondaı-aq, Nursultan Nazarbaev jınalǵan memlekettik qyzmetshilerdiń bárine aldaǵy sıfrlyq dáýir talaby jańashyl sheshimderdi, olardy tıimdi iske asyra alatyn jetekshilerdi qajet etetinin aıtty.
Qazaqstan Prezıdenti el damýynyń jańa kezeńinde mańyzdy oryn alatyn óńirlik kásipkerlikti damytý máselesine toqtaldy.
"Bul jumysty atqarý ákimderge júktelgen. Olarǵa tıisti ókilettikter men múmkindikter berildi. Biz jurtty bıznespen aınalysýǵa úıretýge tıispiz", – dedi Elbasy.
Memleket basshysy áleýmettik salanyń udaıy nazarda bolatynyn jetkizdi.
"Ekonomıka men áleýmettik saladaǵy túbegeıli ózgerister saıası jańǵyrýmen qatar júredi. Aldaǵy ýaqytta bılik tarmaqtary arasyndaǵy ókilettikterdi qaıta bólý Parlamenttiń, Úkimettiń jáne jergilikti memlekettik organdardyń rólin arttyratyn bolady. Sondyqtan keshiktirmeı, múlde jańasha jumys júrgize bastaý qajet," – dedi Nursultan Nazarbaev.
Sońynda Elbasy eldiń basqarýshy korpýsy aldynda turǵan mindetterdiń aýqymdylyǵy men kúrdeliligin, ol saıası memlekettik qyzmetshilerden joǵary jaýapkershilik talap etetin atap ótti.
"Sizder halyqtyń múddesine minsiz qyzmet etip, óz mindetterińizdi abyroımen atqarady dep senemin. Biz táýelsizdigimizdi nyǵaıtý jolynda jáne Qazaqstannyń jarqyn bolashaǵy úshin qolymyzdan kelgenniń bárin jasaýǵa tıispiz," – dep túıindedi Qazaqstan Prezıdenti.