Keń dálizge qoıylǵan kórmeniń kermesinen jylqy kórdim. «At jaqsysy – kermede, sýret jaqsysy – kórmede». «Sáıgúlik semantıkasy» serııasy toptamasyndaǵy sýretter sóılep qoıa berdi. Maıly boıaýmen salynǵan sýretterde túrli obrazǵa toly tulparlardy kórýge bolady. «Qondyger» kartınasynda jylqy men bala bastaryn túıistirip, únsiz uǵynysqan. «Bula men buldyryq», «Qyrkúıek», «Kúder», «Jasyrynbaq», «Qarajal tolqyny», «Qyz alyp qashý» kartınalary syr sandyq sııaqty.
Saz ónerine arnalǵan «Áýen» toptamasynda sýretshi Jeńis Kákenuly sybyzǵy men qobyz tartyp otyrǵan qazaq qyzynyń jan dúnıesin ashyp kórsetken. Ulttyq kıimde, toqpaqtaı burymdy qazaq qyzy arqyly salt-dástúrimizdi, ónerimizdi nasıhattaǵan. «Mahabbat múıisi» – aıly túnde syrlasqan qyz ben jigittiń sulbasyn beıneleý arqyly romantıkaǵa toly jastyq shaqtyń jarasymdy shaqtaryn ásem beıneleıdi.
Belgili sýretshi Jeńis Kákenulynyń shyǵarmashylyq keshin uıymdastyrǵan L.N.Gýmılev atyndaǵy Eýrazııa ulttyq ýnıversıtetiniń «Káýsar» mádenı-tanymdyq birlestiginiń jetekshisi Kenjeǵalı Myrjyqbaev kórme uıymdastyryp qana qoımaı keshti suhbat-dıalog retinde jalǵastyrdy.
Abaı atyndaǵy QazPI-diń kórkemsýret, grafıka fakýltetin bitirip, aýylyna at basyn burǵaly turǵan Jeńisti poezııa padıshasy Farıza Ońǵarsynova darynyn baǵalap, ózi redaktorlyq etken «Pıoner» (Aqjelken) jýrnalyna jumysqa shaqyrady. Jeńis Kákenulynyń alǵashqy eńbek joly, jemisti jyldary áıgili aqyn apasynyń shapaǵatynan bastaý alypty. 1988 jyldan beri elimizdegi kórmelerge, Túrkııa, AQSh, Germanııa kórmelerine qatysqan. Amerıka elinen «Qala kórinisteri» atalymy boıynsha «Altyn qyran» medaline ıe boldy. Jeńis Kákenuly sýretshiler týraly jazylǵan «Aq zer» kitabynyń avtory.
Kesh ıesiniń «óner men úshin tutas. Sýret salǵanda án men kúıdi janyma serik etemin. Kún saıyn terińdi tókpeseń, qolyń kete bastaıdy» dep aıtqan sózderi kezdesýge kelgen jastarǵa úlken oı saldy.
Qylqalamyna Qambar ata tólin arqaý etken Jeńis jylqynyń qadir qasıetine tereń toqtalyp, «Qazaq jylqyǵa qaryzdar» deıdi.
Juldyz TOIBEK