Bul habardy osydan eki aı buryn estigen bolatynbyz. Sol kúnnen bastap oıyn balasynyń taǵdyryna alańdap júretinbiz. Másele bylaı bolǵan. О́tken jyldyń 30 qarashasynda Atbasar qalasyndaǵy 3 jasar sábı oblystyq balalar aýrýhanasyna óte aýyr halde jetkizilgen edi. Ústine qaınap turǵan bir tegene sorpany tógip alǵan Nurtas Qozybekulynyń denesi 80 paıyz kúıikke shaldyqqan eken.
Dárigerler ólim aýzyndaǵy balany ajaldan arashalap qalý úshin baryn saldy. Kásibı biliktiligi men tájirıbesi mol aq halatty abzal jandar qııalǵa syımas erlik jasady. Balanyń denesine terini almastyryp salýǵa baılanysty onnan astam plastıkalyq ota jasaldy. Sonyń nátıjesinde, kishkentaı balanyń ómirin saqtap qaldy. Emdeýshi dáriger Petr Redkozýbovtyń aıtýynsha, qazir Nurtastyń jaǵdaıy birqalypty, keshendi ońaltý sharalary oń nátıjesin berýde. Ol jaqyn kúnderi úıine shyǵatyn bolady.
Biz Nurtastyń anasy Yrysgúlmen aýrýhana aýlasynda tildesken edik.
– Biz ulymyzdyń ómirin saqtap qalǵan Aqmola oblystyq balalar aýrýhanasynyń barlyq dárigerleri men medbıkelerine shyn júrekten alǵysymyzdy aıtamyz. Kózimizden bul-bul usha jazdaǵan baqytymyz qaıta oraldy. Otbasymyz qýanysh qushaǵynda. Dárigerlerdiń janqııarlyq erlik eńbegi, shıpaly qoldary men meıirim-shapaǵatyna dán rızamyz. Olar barsha balalardyń jarqyn bolashaǵyn qamtamasyz etýshiler retinde qandaı qurmetke de laıyqty, – deıdi baqytty ana.
Baqbergen AMALBEK,
«Egemen Qazaqstan»
Aqmola oblysy