Jaqynda Qazaqstan Prezıdenti Nursultan Nazarbaevtyń bılik tarmaqtary arasynda ókilettikterdi qaıta bólý máseleleri jónindegi Úndeýi jarııalanyp, qoǵamnan qyzý qoldaý tapqan bolatyn. Sonymen qatar, artynsha Memleket basshysy «Qazaqstannyń Úshinshi jańǵyrýy: jahandyq básekege qabilettilik» taqyrybynda Qazaqstan halqyna Joldaýyn jarııalady.
Mańyzdy qujattarda Elbasy memleket úshin asa qundy maqsattar men mindetterdi alǵa tartyp, eldiń keleshek damýy jolyndaǵy óziniń oı-pikirlerin de málimdegen edi. Elbasy Úndeýi men Joldaýyn halyqqa keńinen túsindirý maqsatynda Parlament depýtattarynan quralǵan aqparattyq-nasıhattyq top Taraz qalasyna kelgen edi.
Osyǵan oraı, Jambyl oblysy ákimdiginde aktıv jıyny ótti. Jıyndy oblys ákiminiń birinshi orynbasary Bekbolat Orynbekov júrgizip otyrdy. Áýeli Parlament Májilisiniń depýtaty Baıdilda Jylqyshıev sóz alyp, Elbasy Úndeýi jóninde pikirin bildirdi. О́z sózinde halyq qalaýlysy budan bylaı da elimizde prezıdenttik basqarý formasynyń saqtalatynyn aıta kelip, ishki jáne syrtqy saıasat, qorǵanys máseleleri jónindegi oıyn jetkizdi.
Ásirese, Elbasynyń áleýmettik-ekonomıkalyq salaǵa erekshe basymdyq berip otyrǵanyn aıtty. Sondaı-aq, májilismender Qojahan Jabaǵıev jáne Sáken Qanybekov Elbasy Joldaýynda aıtylǵan maqsattar men mindetterge toqtaldy. Joldaýda aıtylǵan bilim berý, densaýlyq saqtaý, áleýmet, aýylsharýashylyq salalary boıynsha da áńgimeledi.
Budan keıin jaryssózge «Nur Otan» partııasy Jambyl oblystyq fılıaly tóraǵasynyń orynbasary Shábden Tileýmurat, Taraz ınnovasııalyq-gýmanıtarlyq ýnıversıtetiniń rektory, oblystyq máslıhattyń depýtaty Erbolat Saýryqov jáne oblys ákimi apparatynyń «Qoǵamdyq kelisim» KMM bas sarapshysy Larısa Lysova shyǵyp, Elbasy Joldaýynyń jan-jaqtylyǵyn, óz kezeginde atalǵan mańyzdy qujat el ómirinde iri oqıǵa bolǵanyn atap ótti.
Parlament Májilisiniń depýtattary jumys saparyn aqpan aıynyń alǵashqy onkúndiginde oblystyń aýdandary men aýyldarynda jalǵastyratyn bolady.
Hamıt ESAMAN,
«Egemen Qazaqstan»
TARAZ
Sýretti túsirgen
Altynbek QARTABAI