Qazaqstan jastary kongresiniń Qazaqstan Respýblıkasy
Prezıdentiniń halyqqa arnaǵan Joldaýyn qoldaý jónindegi
ÚNDEÝI
Búgingi kúnde Qazaqstan jastary azamattyq qoǵamnyń tolyq quqyqty, talapty jáne jaýapty sýbektisine aınalǵan. Jastar úshin kóptegen baǵdarlamalar iske asyrylýda. Jyl saıyn myńdaǵan jas maman – joǵary oqý oryndary men kolledj túlekteri el erteńin eńselendirýge úles qosýdyń jańa múmkindikterine ıe bolýda. Munyń barlyǵy – Elbasymyzdyń kóregen saıasatynyń jemisi. Qazaqstan jastarynyń kongresi Elbasynyń «Qazaqstannyń Úshinshi jańǵyrýy: jahandyq básekege qabilettilik» Joldaýyndaǵy bastamalaryn tolyqtaı qoldaıtyny týraly málimdeıdi. 25 jyl ishinde qarqyndy ári maqsatty damyǵan Qazaqstan álem sahnasynda bedeldi orynǵa ıe boldy. Bul jetistik – alǵashqy eki jańǵyrý kezeńderiniń nátıjesi. Ol jyldarda jastar elimizdiń tabystarynda mańyzdy ról atqardy. Prezıdent óziniń Joldaýynda elimizdiń damyǵan memleketterdiń qataryna qosylýyna múmkindik beretin mynadaı mańyzdy baǵyttarǵa ekpin túsirdi. Olar – ekonomıkany qarqyndy túrde tehnologııalyq jańǵyrtý; dástúrli negizgi salalardy damytý; eńbek naryǵyn jańǵyrtý; makroekonomıkalyq turaqtylyq; adamı kapıtaldyń sapasyn kóterý; ınstıtýttyq túrlendirý, qaýipsizdik, sybaılas jemqorlyqpen kúres. Qazaqstan jastaryn biriktirýshi jastar uıymy retinde biz Prezıdent bastamalary qazirgi zaman talaptaryna saı dep sanaımyz. Elimizdiń jas býyny úshin bilim, eńbek naryǵy, aqparattyq tehnologııalardyń damýy máseleleri erekshe mańyzdy. 2015 jyly Elbasymyz «Tegin kásibı-tehnıkalyq bilim» jobasyn usynǵan bolatyn. Osy jyly atalǵan joba óziniń jappaı iske asyrylý satysyna kóteriledi jáne kóptegen stýdentke óz jolyn tabýyna kómektesedi. Sonymen qatar, Nursultan Ábishuly eń aldymen bilim berý júıesiniń rólin ózgertý qajet ekenin belgiledi. «Bizdiń mindetimiz – bilim arqyly ekonomıkalyq ósý modeliniń ortalyq túıinin qalyptastyrý. Oqý baǵdarlamalaryn syndarly oılaý, ózdiginen aqparat izdeý daǵdylaryn damytýǵa baǵyttaý qajet», dedi óziniń Joldaýynda Elbasy. Sondaı-aq, Prezıdent IT-bilim, qarjylyq saýattylyqty qalyptastyrý men patrıottyq tárbıeniń ózektiligin atap kórsetti. Munyń barlyǵy jastardyń boıynda memleketimizdiń jańa damý kezeńinde qajetti, ómir úshin mańyzdy jańa daǵdylar men qabiletterdi qalyptastyrady. Bilim berý júıesinde IT-salanyń qarqyndy damýy jáne muǵalimder biliktiliginiń joǵarylaýy qala men aýyl mektepteriniń arasyndaǵy bilim sapasynyń aıyrmashylyǵyn azaıtýǵa septigin tıgizetini aıqyn. Jas qazaqstandyqtar úshin eń mańyzdy másele – jumysqa ornalasý máselesi. Eńbek naryǵyn jańǵyrtý maqsatynda Elbasymyz óz Joldaýynda jumyskerlerdiń jańa zaman salalarynyń mamandyqtaryna kóshýi úshin qolaıly jaǵdaılar jasaý mindetin qoıdy. Osyǵan oraı, Prezıdent eńbekpen qamtýdyń jańa Jol kartasyn ázirleý qajettigin atap kórsetti. Mundaı jol kartalary jumys berýshilerdiń jumyssyzdardy qaıta daıyndaýǵa jáne jańadan jumysqa ornalastyrýǵa mindetteıdi. Qazaqstan jastarynyń atynan Elbasy Joldaýyndaǵy baǵyttardy tolyqtaı qoldaıtynymyz týraly málimdeımiz! Álemniń jahandanýy bizden jańa kózqarastar men jańa eńbek naryǵyn talap etedi. Elbasynyń «Qazaqstannyń Úshinshi jańǵyrýy: jahandyq básekege qabilettilik» atty Joldaýy bizge «Máńgilik El» ulttyq ıdeıasyna jetýde serpindi qadam jasaýǵa, ekonomıkalyq ósýdiń jańa modelin qalyptastyrýǵa, básekelestik qabiletimizdi nyǵaıtýǵa jáne 2030 jyly 30 damyǵan elder qataryna qosylýǵa zor yqpalyn tıgizetinine senimdimiz. Qazaqstan jastarynyń kongresi