О́tken jyly Qazaqstannyń medısınalyq uıymdarynda emdelgen shetel azamattarynyń sany 2015 jylmen salystyrǵanda 28%-ǵa artyp, 5 myń adamdy qurady, dep habarlaıdy QR DSM baspasóz qyzmeti. Medısınalyq qyzmetter Túrkııa, Úndistan, Reseı, Ulybrıtanııa, AQSh, Koreıa, Qytaı syndy alys-jaqyn shetel azamattaryna kórsetildi.
Sheteldik pasıentterdiń arasynda konsýltatıvtik-dıagnostıkalyq, stasıonarlyq, neırohırýrgııalyq, kardıohırýrgııalyq, travmatologııalyq qyzmetter, sonymen birge, transplantologııa jáne t.b. suranysqa ıe.
«Neırohırýrgııa ulttyq ortalyǵy pasıentterge medısınalyq kómek kórsetý sapasynyń Joint Commission International eń joǵary halyqaralyq standartymen sertıfıkattalǵan. Atalǵan uıym álem boıynsha shetel azamattaryna arnalǵan aýrýhanalardy tekserip, standarttaýmen aınalysady. Ortalyqtyń bul standarttarǵa saı kelýi - medısınalyq týrızmniń halyqaralyq naryǵyna jol ashty», - deıdi «Neırohırýrgııa ulttyq ortalyǵy» AQ-nyń basqarma basshysy Serik Aqsholaqov.
«Alǵashqy jyldary neırohırýrgııa ortalyǵyna medısınalyq týrızm boıynsha qabyldanǵan adamdar sany az bolatyn. О́tken jyly alys jaqyn shetel men TMD elderinen emdelýge 35 pasıent keldi. Bizdiń ortalyqta em alǵysy keletin sheteldikter sany kún sanap ósýde. 8 jylda Neırohırýrgııa ulttyq ortalyǵynda 180-nen astam shetel azamattaryna ota jasaldy», - dep málim etti ol.
Densaýlyq saqtaý júıesin jańǵyrtý - pasıentterge medısınalyq kómek kórsetý sharalarynyń sapasy men qoljetimdiligin, qaýipsizdigin arttyryp, elimizdegi medısınalyq týrızmdi damytýǵa jaǵdaı jasady. Aıta ketý kerek, Qazaqstanda kórsetiletin medısınalyq qyzmetterdiń baǵasy shetelde kórsetiletin qyzmetterden áldeqaıda arzan.