«Amanat» qoǵamdyq syılyǵy elimizdiń áleýmettik-ekonomıkalyq ári qoǵamdyq ómirine eleýli úles qosqan jáne qyzmeti jasampaz eńbekke, ıgilik pen aqyl-parasatqa negizdelgen jalpy adamzat qundylyqtaryn nyǵaıtýǵa kómektesetin adamdardy kótermeleýge arnalǵan. Bul týraly Ortalyq kommýnıkasııalar qyzmetinde ótken baspasóz konferensııasynda «Adamdardyń eleýli jetistikteri» Qoǵamdyq qorynyń prezıdenti Zaýre Beısova málim etti.
Onyń aıtýynsha, Qor óz jumysyn júıelendirý úshin turaqty damý qaǵıdalaryn ilgeriletý boıynsha «Amanat» baǵdarlamasyn ázirleý týraly bastama kóterip, «Amanat» qoǵamdyq syılyǵyn uıymdastyrdy.
«Syılyqty alýǵa úmitkerlerdi úkimettik emes uıymdar usynady. Syılyq «Babalar amanaty», «Shynar», «Bekzat», «Arys», «Qaınar», «Degdar», «Jiger» nomınasııalary boıynsha beriledi», – dep atap ótti Z.Beısova.
Sondaı-aq ol qoǵamdyq syılyqty taǵaıyndaý boıynsha baıqaý búginnen bastalǵanyn jarııa etti.
«Baıqaý bastaldy. Al aqpan-maýsym aralyǵynda baıqaýdyń óńirlik kezeńderin áleýmettik marafon túrinde ótkizýdi usynamyz. Bıylǵy jyldyń 1 mamyryna deıin ótinimder qabyldanady. О́tinimder oblystar, respýblıkalyq mańyzy bar Astana jáne Almaty qalalaryndaǵy qoǵamdyq keńester negizinde qurylǵan uıymdastyrýshy komıtetine beriledi», – dedi Qoǵamdyq qor prezıdenti.
Aıdar О́risbaev, "Egemen Qazaqstan".