Nursultan Nazarbaev salyq zańnamasyn jeńildetýdi tapsyrdy. Bul týraly Memleket basshysy Úkimettiń keńeıtilgen otyrysynda aıtty.
"Salyq zańnamasynyń kúrdeliligi kedergi keltiredi. Mysaly, salyq tóleýshi qosymsha qun salyǵy boıynsha Salyq kodeksiniń 82 babyn bilý kerek. О́z kezeginde ár bapta 268 silteme bar bolsa, olardyń eki júz altysynda taǵy da ári qaraı siltemeler kórsetiledi. Sizder qandaı jaǵdaı jasaǵansyzdar? Sizder úkimetke qarsy jumys istep jatyrsyzdar. Bul máselemen endi kim aınalysady? Olar (kásipkerler - avtor.) jumys isteı me álde osy qaǵazdardy aqtaryp otyra ma?", - dedi Nazarbaev.
"Rasynda da bizde Salyq kodeksine qatysty problema bar", - dedi qarjy mınıstri Prezıdentke.
"Salyq kodeksin qarap kórińizdershi, bireý ony dushpandylyqpen jasaǵan. Kodeksti alyp, ondaǵy baptardy túsinikti etip, barynsha qarapaıym tilmen jeńildetińizder", - dedi Prezıdent.
"Tapsyrma berildi, kodeksti jeńildetemiz", - dedi mınıstr Baqyt Sultanov vedomstvonyń osy máselemen aınalysyp jatqanyn aıta otyryp.
"Salyq zańnamasy barynsha ońaı ári túsinikti bolýy kerek. Tekseris júrgizý kerek, barlyq salyq jeńildikteri men preferensııalaryn alyp tastaý kerek. Salyq zańnamasy iskerlik belsendilikti arttyrý kerek", - dedi Memleket basshysy.