Anglııanyń «Vest Hem», «Sýonsı», «Chelsı», «Manchester Sıtı», sondaı-aq Amerıkanyń «Nıý-Iork Sıtı» klýbtarynda oınaǵan Frenk Lempard fýtboldaǵy ǵumyryn aıaqtady. Bul týraly eurosport.ru habarlady.
«Fýtbolda ǵajaıypqa toly 21 jylymdy ótkizdim. Biraq endigi mansabymdy aıaqtaý týraly sheshim qabyldap otyrmyn. Jasym 38-ge kelse de, maǵan birqatar usynystar kelip tústi, biraq ómirimniń jańa bir kezeńine qadam basýdy jón kórip otyrmyn.
Fýtbolda biraz kýboktar utyp alǵanym, Anglııa quramasynyń sapynda 100-den astam match ótkizgenim, mansabymda 300-den astam gol soqqanym úshin qatty qýanamyn. Mundaı jetistikterge jetýime dostarym, jaqyndarym, ata-anam úlken kómegin tıgizdi. Olarǵa alǵysym sheksiz. Fýtbolda meni jattyqtyrǵan árbir jattyqtyrýshym meni jańa bir deńgeıge shyǵaryp otyrdy. Olardyń orny men úshin erekshe.
Sonymen qatar, oınaǵan klýbtaryma da sheksiz rızamyn. Eń birinshi 1996 jyly alǵash ret alańǵa shyǵýyma septigin tıgizgen «Vest Hemge» qaryzdarmyn. Al sońǵy jyldary «Manchester Sıtı» men «Nıý-Iork Sıtı» komandalarynda fýtboldan ózgeshe bir lázzat aldym.
Árıne, júregimniń basym bóligi «Chelsıge» tıesili. Munda esten ketpes on úsh jylymdy ótkizdim. Áriptesterimmen birge jetken jeńisterimdi eshqashan umytpaspyn. Al jankúıerlerdiń maǵan, komandamyzǵa kórsetken qoldaýyna baǵa jetpeıdi.
Endi ómirimdi basqa arnaǵa buratyn mezgil jetti. Jattyqtyrýshy retinde synaqtan ótý múmkindigin berip otyrǵan Anglııa fýtbol qaýymdastyǵyna alǵysymdy bildiremin», – dep jazdy Lempard.
The Times málimeti boıynsha Anglııa fýtbol qaýymdastyǵy oǵan jastar komandasyn jattyqtyrý múmkindigin usynyp otyr. Al «Chelsı» komandasy óz kezeginde jattyqtyrýshylyq ári elshilik qyzmet usynbaq.
Aıta keteıik, Frenk Lempard tórt dúrkin Anglııa chempıony atanyp, tórt márte el Kýbogynda jeńiske jetken. Eki retten Lıga Kýbogy men Anglııa Sýperkýbogyn utqan. Sonymen qatar, Chempıondar lıgasy men Eýropa lıgasynda top jarǵan.