QR Prezıdenti Nursultan Nazarbaev balabaqshalardy ashý isine bıznesmenderdi belsendi tartý jóninde tapsyrma berdi.
«Sońǵy úsh jylda elimizde 100 myń orynǵa 1,3 myń jeke balabaqshalar ashyldy. Olardyń kóbi Ońtústik Qazaqstan oblysynda, ıaǵnı 400-i iske qosyldy. Almaty oblysynda -220, Qyzylorda oblysynda -180, Almaty qalasynda -180 balabaqsha paıdalanýǵa berildi. Bular osy baǵytta alda kele jatqan óńirler. Al keıbir oblystarda bul jumys júzege asyrylyp jatqan joq. Memlekettik jekemenshik- seriktestikti damytý boıynsha Pavlodar oblysy qalyp kele jatyr. Úsh jylda 160 orynǵa tek 2 shaǵyn ortalyq ashyldy», – dep toqtaldy Memleket basshysy.
Osy oraıda Elbasy Pavlodar oblysynyń ákimi Bolat Baqaýovqa memlekettik-jekemenshik seriktestiktik aıasynda balabaqshalardy ashý isinde belsendilik tanytýdy tapsyrdy.
«Oblystaǵy bıznesmenderdi tartý kerek. Bul baǵytta olardy yntalandyrý qajet, ıaǵnı jer telimderin bólý nemese salynyp jatqan úılerdiń birinshi qabatynan oryn berý kerek. Osynyń barlyǵy paıdaly bıznes. Árbir balanyń sońynan memlekettiń jáne ata-ananyń aqshasy ilesip júredi», – dedi Nursultan Nazarbaev.
О́z kezeginde QR Bilim jáne ǵylym mınıstri Erlan Saǵadıev 2017 jyldan bastap RB jáne Ulttyq qor esebinen balabaqshalar salmaý týraly sheshim qabyldanǵanyn jetkizdi.
«Ǵımarattardyń birinshi qabattarynda balabaqshalardy qurýdy aıtarlyqtaı jeńildetetindeı jańa sanıtarlyq normalar men erejelerdi qabyldadyq. Aldaǵy ýaqytta balabaqshalardy negizinen tek jeke sektordyń esebinen qamtamasyz etýdi oılastyryp otyrmyz», – dedi mınıstr.