Premer-mınıstrdiń orynbasary Imanǵalı Tasmaǵambetov Qazaqstannyń Reseıdegi elshisi bolyp taǵaıyndaldy, dep jazady 24.kz.
Bul qyzmetke Tasmaǵambetovtyń ózi suranǵandyqtan, Elbasy Nursultan Nazarbaev osyndaı sheshim qabyldap otyr. Memleket basshysy osyǵan baılanysty málimdeme jasap, onda Densaýlyq saqtaý jáne áleýmettik damý mınıstrligin nelikten bólip, qaıta qurǵanyn da túsindirdi.
"Úkimettiń keńeıtilgen óte mańyzdy jıyny ótti. Ákimder qatysty. Jasap jatqan sharýalary belgili. Eki úlken másele. Birinshisi – saıası reformalar, Konstıtýsııaǵa ózgerister engizý. Ekinshisi – Qazaqctannyń úshinshi jańǵyrýy degen úlken joldaý. Osyǵan baılanysty málimdeıin, kadr máselelerinde biraz ózgerister jasadyq. О́zderińiz bilesizder. «Báıterek» ujymynda jasalyp jatqan tekseris máselesine qatysty Ekonomıka mınıstri jumystan bosatyldy. Tımýr Súleımenov degen azamat onyń ornyna mınıstr bolyp taǵaıyndaldy. Saýatty, tájirıbeli. Máskeýde jumys istep keldi. Sol mınıstrliktiń orynbasary bolǵan. Menińshe, daıyndyǵy jaqsy bolady, dep taǵy da senim artamyz. Ekinshiden, eki mınıstrlikti ajyratyp, Densaýlyq saqtaý mınıstrligin jekeshe qurǵan sebebimiz, densaýlyq saqtaýdaǵy saqtandyrý máselesinde kóp jumystar bar. Halyqqa sony túsindirý kerek jáne sony iske asyrý kerek. Bul halyqqa qajet. Densaýlyq júıesine óte qajet másele. Birtanov degen óte saýatty azamat. Amerıkada oqyp kelgen. Nazarbaev Ýnıversıtetinde jumys istegen. Sol mınıstrliktiń orynbasary boldy. Jumysty biledi, atqarady dep senemin. Úshinshiden, men Máskeýdegi Qazaqstannyń elshisin taǵaıyndadym. Ol elshi Imanǵalı Tasmaǵambetov bolatyn boldy. Birinshiden, biz úshin Reseı óte úlken kórshi, áriptes, ekonomıka, saıasat jaǵynan óte jaqyn memleket. Ol jerge óte beldi, tájirıbeli, salmaqty, Qazaqstan men Reseıdiń arasyndaǵy jaǵdaıdy biletin adam bolǵannan keıin osyndaı sheshim qabyldadym. Ekinshi qabyldaǵan sebebim, Tasmaǵambetovtyń óziniń suraýy solaı boldy. О́ziniń oıy, kóńili. Sol jaqta istep kelemin dep, menen suraǵannan keıin ony da eskerip, eki jaǵynan da týra keletin bolǵannan keıin taǵaıyndadym. Premer-mınıstr orynbasarlarynyń az bolǵany jón. Mınıstrler óz sharýasyn bitirý kerek eshkimge siltemeı, eshkimge súıenbeı. Bergen máseleni sheship, ózderi jaýap berý kerek", - dedi Nursultan Nazarbaev.