Qazaqstan Respýblıkasynyń Qorǵanys mınıstri Ádilbek Jaqsybekov jumys saparymen Venada boldy. Munda ol Qazaqstan Respýblıkasynyń qaýipsizdik máselesi boıynsha forýmǵa tóraǵalyq etýiniń resmı túrde ashylýyna qatysty.
Sapar barysynda Qazaqstan qorǵanys vedomstvosynyń basshysy EQYU Bas hatshysy Lamberto Zannermen kezdesti. Ádilbek Jaqsybekov ony jaqynda ǵana joǵary ári mártebeli qyzmetke taǵaıyndalýymen quttyqtady. Qazaqstan Respýblıkasynyń tóraǵalyq etýine arnalǵan saltanattyń ashylýynda sóılegen sózinde Ádilbek Jaqsybekov Uıymnyń áskerı-saıası damýyna Kóshbasshymyz – el Prezıdenti Nursultan Nazarbaevtyń qosqan úlesi zor ekendigin atap ótti.
Senim men qaýipsizdik sharalaryn kúsheıtý úshin basqa da qatysýshy memlekettermen ınspeksııalyq jumystar belsendi júrgizilýde, áriptestik qarym-qatynastar nyǵaıýda. Qazaqstan Uıymnyń belsendi múshesi retinde Ujymdyq qaýipsizdik sharty uıymy aýmaǵynda qaýipsizdik máselesin qoldap kelgen jáne budan bylaı da qoldaý kórsete bermek.
Forýmda qazaqstandyq delegasııa Vena qujatyn jetildire túsý týraly máseleni talqylap, ony sheshýdegi avtorlardyń birine aınaldy. Qorǵanys vedomstvosynyń basshysy Qazaqstannyń alǵa qadam basýǵa nıetti ekendigin bildirdi.
– Biz Qazaqstan basshysy men Úkimetiniń Vena qujatyn jańartý jónindegi 2010 jyly Astana qalasynda bergen tapsyrmasyn oryndaýǵa tıisti ekenimizdi jete túsinemiz, – dedi Ádilbek Jaqsybekov. – Bıylǵy jylǵy qarasha aıynda qujatty jańartýdyń birinshi kezeńin tabysty aıaqtaýǵa bizdiń qajyr-qaıratymyzdyń jetetindigine senemiz jáne osy baǵytqa bar kúshti jumyldyrýǵa barlyǵyńyzdy shaqyramyz.
Oksana PARPÝRA, Qorǵanys mınıstrligi baspasóz qyzmetiniń qyzmetkeri.
Sýretti túsirgen Ermek SARBASOV.