О́tken ǵasyrdyń alpysynshy jyldarynyń ortasy bolsa kerek. Almatyda jeńil atletıkadan respýblıkalyq jarys ótetin bolady da, sol jerge jas sport jýrnalısi Seıdahmet Berdiqulov aǵamyz keledi. Jarysty ótkizýge tıisti memlekettik jattyqtyrýshynyń qolyndaǵy qaǵazǵa úńiledi. Paraqtaı bastaǵan. Sol kezde kógildir kózine muz qatqan áıel keketken keıippen: «Jas jigit, bul tizimnen kimderdi izdep turǵanyńdy bilemin. Biraq seniń ókinishińe qaraı, olar bul bes jyldyqta da, kelesi bes jyldyqta da bul tizimde bolmaıdy», degendeı oı aıtady.
Búginde qazaq sport jýrnalıstıkasynyń atasyna balanǵan Seıdahmet Berdiqulov aǵamyzdyń júzi tútigip ketedi. El, jer qazaqtiki, biraq sportshylar arasynda qazaq jastary joq. Arǵy-bergini túgendegen qaıran aǵamyz: «Meni izdegen sol jastar joq bolsa, ol eń aldymen sizdiń kináńiz, Olga hanym», dep kúıinedi. Dál osylaı aıtylmasa da, nobaıy osy. Kitabynan oqyp, júregimiz aýyrǵan.
Seıdahmet aǵamyz qazaq jampozdary dese, janyn qıǵandaı azamat qoı. Ultyn súıgen adam – naǵyz myqty adam. Uly ustazymyzdan qalǵan ádet pe, ultshyldyqqa jatqyzasyz ba, biz de osy jaǵyn túgendeı júretin bolǵanbyz...
Ýnıversıadada short-trekten memlekettik jattyqtyrýshy Sofııa Tileýbaevamen áńgimelestik. Buryn bıatlon sportynda jattyqtyrýshy bolǵan qyzdyń qysqy sport túrlerinde talantty qazaq jastarynyń kóbeıip kele jatqandyǵyn aıtty.
Qazaq jastaryna «Abylaı aspas sary beldeı» kórinetin short-trekte tolyqtaı jastarymyz óner kórsetedi. Frıstaıldyń akrobatıka túrinen jarysqa shyqqandardyń bári – qazaq. Hokkeıden qyzdar quramasynyń teń jartysyna jýyǵy qazaq jastary. Basqa da sport túrlerinde qandastarymyz kóbeıip keledi.
Osy kezde «Siz izdegen jastar kóbeıdi, Seıdaǵa!» dep ustazymyzdyń rýhyna bas ıemiz.
Baqtııar TAIJAN,
«Egemen Qazaqstan»
ALMATY