Keshe Úkimet úıinde Premer-Mınıstr Kárim Másimov Pákstan Islam Respýblıkasynyń Premer-mınıstri Saıed Iýsýf Reza Gılanımen kezdesti. Eki el úkimet basshylarynyń kezdesýi aıasynda elimizdiń Saýda ónerkásip palatasy men Pákstan Saýda ekonomıkalyq palatalary federasııasynyń arasynda ózara yntymaqtastyq týraly kelisimge qol qoıyldy.
Kezdesýden keıin jýrnalıstermen júzdesken Pákstan Islam Respýblıkasynyń Premer-mınıstri Saıed Iýsýf Reza Gılanı ekijaqty kelissózder kezinde qos memleket arasyndaǵy yntymaqtastyqty jańasha deńgeıge kóterý máselesi sóz bolǵanyn aıta kele, áriptestikke jańasha serpin beretin ýaqyt kelgenin jáne kelissózder barysynda osy máselelerge basa nazar aýdarylyp, ekijaqty yqpaldastyqty kúsheıtý úshin turaqty keńester ótkizý uıǵarǵandyǵyn jetkizdi. Sondaı-aq ol kólik jáne kommýnıkasııa salasynda, onyń ishinde temir jol, avtojol jáne áýe qatynastaryn damytýǵa múmkindik mol ekenin de nazardan tys qaldyrmady. Pákstan Úkimeti basshysy, sonymen qatar, «Biz energetıka salasyndaǵy zor áleýetimizdi ıgerýimiz kerek. Budan ózge biz ekonomıka, saýda, ónerkásip, aýyl sharýashylyǵy, qorǵanys ónerkásibi sekildi ózge de aýqymdy máseleler boıynsha ortaq sheshimge keldik. Saıyp kelgende, meniń jumys saparym tabysty ótýde», dedi.
Ábdirahman QYDYRBEK.