Elbasy Nursultan Nazarbaevtyń Qazaqstan halqyna arnaǵan Joldaýyn talqylaý úshin aýdandar men qalalar ákimderiniń orynbasarlary, kásipkerler, sharýashylyq basshylary, úkimettik emes uıymdar ókilderi bas qosqan keńeıtilgen májiliste oblys ákimi Arhımed Muhambetov Elbasy Joldaýy elimiz damýynyń baǵytyn aıqyndap jáne naqty tapsyrmalar bergenin atap kórsetti.
– Jas táýelsiz memleketimizdi naryqtyq ekonomıka qurýǵa baǵyttaǵan Birinshi jańǵyrý elimizde birlik pen turaqtylyqtyń negizin qalap berdi. «Qazaqstan-2030» baǵdarlamasynyń aldyna jańa mindetter qoıǵan kezeńde álemdegi básekege qabiletti elý eldiń qataryna qosyldyq. Úshinshi jańǵyrýmen baılanysty Joldaý eldiń osy kezge deıin baǵyndyrǵan belesterin nyǵaıta otyryp, básekelestikke qabilettilikti qamtamasyz etetin ekonomıkalyq jańa baǵdarlardy qurýǵa negizdelgen, – dedi Arhımed Begejanuly.
Táýelsiz elimizdiń aýyl sharýashylyǵyn damytýǵa tájirıbesimen, biliktiligimen mol úles qosqan Qazaqstannyń Eńbek Eri Saıran Buqanov Joldaýda osy salany serpin bere damytý máselesiniń óte durys qoıylǵanyna toqtaldy.
– Elbasy Qazaqstan Eýrazııanyń «nan kárzeńkesi» bolýy kerektigin durys kórsetken. Osy tapsyrma údesinen shyǵýǵa tolyq múmkindik bar dep bilemin. О́ıtkeni, bir Qostanaı oblysynyń ózi jyl saıyn 5 mıllıon tonna astyq óndiredi. Qazir bizdiń aldymyzda shıkizat óndirýden óńdeý ónerkásibin damytýǵa qaraı jyljý máselesi tur. Bul boıynsha oblysta jaqsy jumystar júrip jatyr. Egis alqaptaryn ártaraptandyrý, sóıtip Qostanaıda bolashaqta jylyna 300 myń tonna maı óndire alatyn zaýyt úshin maıly daqyldar alqabyn kóbeıte beretin bolamyz. Ol úshin memleket tarapynan sýbsıdııa bólinip, qajetti múmkindik jasalýy kerek, – dedi Saıran Bálkenuly.
Elbasy Joldaýda «eksportqa baǵdarlanǵan elektromobıl óndirisin odan ári damytý máselesin pysyqtaýdy tapsyramyn» dep mindet qoıady. Al ótken 2016 jyly Qostanaı qalasynda 12 elektromobıl sapqa qoıyldy.
– Qazaqstanda ınfraqurylymnyń áli jetkiliksizdiginen elektromobılderge suranys irkilip tur. Biraq bul memlekettik dárejede sheshimin tappaq. Sonyń ishinde Almaty qalasy ákimdigi men AllurGroup kompanııasy arasyndaǵy memorandýmǵa sáıkes ońtústik astanada elektromobılderge arnalǵan 40 tokpen qýattalatyn beket ashylatyn bolady. Osyndaı memlekettik qoldaýdyń arqasynda jaqyn jyldary bul kólik qazaqstandyqtar úshin naǵyz ómir shyndyǵyna aınalady, – dedi AllurGroup kompanııasynyń prezıdenti Oleg Soı.
Keńeıtilgen májilisti qorytyndylaǵan oblys ákimi Arhımed Muhambetov Joldaýda aıtylǵan Elbasy tapsyrmalaryna jeke-jeke toqtap, ol boıynsha oblysta júrgiziletin jumystardy tereń taldap kórsetti.
Názıra JÁRIMBETOVA, «Egemen Qazaqstan»
QOSTANAI