QR Premer-Mınıstri Baqytjan Saǵyntaev QR Úkimeti otyrysy barysynda medısınalyq saqtandyrýdy engizýge erekshe nazar aýdarýdy tapsyrdy, dep jazady pm.kz.
Eske sala keteıik, keshe Memleket basshysy Nursultan Nazarbaev birqatar naqty tapsyrmalar bergen QR Úkimetiniń keńeıtilgen otyrysy ótti.
Úkimet basshysynyń aıtýynsha, densaýlyq saqtaý salasynda, birinshi kezekte, uzaqmerzimdik negizde otandyq óndirýshiden dári-dármek pen medısınalyq maqsattaǵy buıymdardy satyp alýdy ulǵaıtý jónindegi tıisti sharalardy qabyldaý qajet, sonymen qatar olardy satyp alý prosedýralarynyń aıqyndyǵyn qamtamasyz etý kerek.
«Medısınalyq tehnıkalardy tıimdi paıdalaný úshin, jetkizýshilerdiń tehnıkany paıdalanýdyń tolyq merziminde servıstik qyzmet kórsetý shartymen, medısınalyq tehnıkany satyp alý tetigin ázirleýdi tapsyramyn», - dedi B. Saǵyntaev.
Sonymen qatar, durys baǵa belgileý úshin medısınalyq tehnıkanyń Biryńǵaı nomenklatýrasyn qurý tapsyryldy. Medısınalyq saqtandyrýdyń mindetti júıesin engizýge basa nazar aýdarý kerek.
«Bilim berý týraly aıtar bolsaq, jalpy Prezıdent atalǵan saladaǵy jańa tásilderge qoldaý bildirdi», - dedi Úkimet basshysy.
Sonymen qosa, bilim jáne ǵylym mınıstri E. Saǵadıevke halyq arasynda 12 jyldyq bilim berý júıesine aýysý, úshtildilik jáne UBT-nyń jańa júıesi jóninde saýatty túsindirý jumystaryn uıymdastyrý tapsyryldy.
«Bul jumysqa Aqparat jáne kommýnıkasııalar mınıstrligi de atsalysýy kerek», - dep sózin qorytyndylady Premer.