Baqytjan Saǵyntaev QR Úkimeti otyrysy barysynda memlekettik satyp alýlar janyndaǵy otandyq taýarlar úlesin arttyrýdy tapsyrdy, dep jazady pm.kz.
QR Premer-Mınıstri B. Saǵyntaev avtokólikter boıynsha ortalyqtandyrylǵan memlekettik satyp alýlar tetigin engizý otandyq óndirýshilerdiń áleýetin arttyryp, olardyń óndirisin jańǵyrtýǵa múmkindik bergenin aıtyp ótti.
«Biz bıylǵy jyly atalǵan jumysty jıhaz ben jeńil ónerkásipte júrgizý jóninde kelisip qoıdyq. Osyǵan uqsas tásildi engizetin salalardyń tizimin ulǵaıtý kerek», - dedi B. Saǵyntaev.
Osyǵan oraı, Investısııalar mınıstrligine UKP-men birlesip bir aptada atalǵan másele boıynsha naqty usynystar engizý tapsyryldy.
Budan ózge, Qarjy mınıstrligine tıisti memlekettik organdarmen birlesip, barlyq memlekettik satyp alýlardy júrgizý kezinde otandyq ónimdi paıdalaný turǵysynan konkýrstyq qujattamany tııanaqty túrde tekserý tapsyryldy.
Budan bólek, B. Saǵyntaev kvazımemlekettik sektordyń satyp alý jumysyna toqtaldy. Ol bul máselede biryńǵaı saıasattyń joq ekenin aıtyp, bir aptalyq merzimde osy kompanııalarǵa arnalǵan, aıqyndyq pen qoljetimdilik eskerilgen, satyp alýlardyń biryńǵaı erejeleri boıynsha ortaq tásildeme ázirleýdi tapsyrdy.
«Atalǵan tásilder negizinde Qarjy mınıstrligine birinshi toqsannyń sońyna deıin tıisti zań jobasyn ázirleýdi tapsyramyn», - dedi B. Saǵyntaev.
Sonymen qatar, QR Premer-Mınıstri ınvestısııalar jáne damý, qarjy mınıstrlikterine UKP jáne ulttyq holdıngtermen birlesip, kvazımemlekettik sektor men jer qoınaýyn paıdalanýshylardy qosyp, tıisti derekter bazasyn biriktire otyryp, satyp alýlar men óndirýshilerdiń biryńǵaı IT-platformasyn qurýdy tapsyrdy.
Budan ózge, Investısııalar jáne damý, Energetıka mınıstrlikterine «Samuryq-Qazyna» jáne ákimdermen birlesip, árbir iri kásiporynmen jumys júrgizip, jergilikti qamtýdy ulǵaıtý boıynsha maqsatty ındıkatordy belgileý tapsyryldy.
«Memlekettik satyp alýlar jónindegi máselelerdi ózim baqylaýda ustaımyn», - dedi B. Saǵyntaev.