Ońtústik Qazaqstan oblysynyń ákimi Janseıit Túımebaev Shymkenttegi tamaq ónerkásibindegi tutynýshylardyń basym bóligi tutynatyn makaron, un jáne sút ónimderin joǵary sapada daıyndaıtyn «Altyn dán» JShS-ne arnaıy baryp, ondaǵy jumystarmen tanysty, dep habarlady OQO ákiminiń baspasóz qyzmeti.
Seriktestikti aralaý barysynda oblys basshysy otandyq ónimge memlekettik tapsyrysty kúsheıtýge naqty jumys josparyn qurý kerek ekendigin aıtyp, osy baǵyttaǵy jumystardy júıeleýdi tapsyrdy. Sondaı-aq, kásiporyn ujymymen kezdesý barysynda aımaq basshysy kəsipkerler úshin əkimshilik kedergilerdi joıý maqsatynda naqty is-sharalar qolǵa alynyp, bul baǵytta jumystar júrgizilip jatqanyn jetkizdi.
«Kompanııa suranysy eń joǵary taǵamdardy sapaly túrde óndirýmen qatar, 1200-ge jýyq adamdy jumyspen qamtamasyz etip otyr. Mundaı kompanııalar kásip ashyp, jumys bastaǵysy kelgen azamattarǵa táp-táýir úlgi dep bilemin. Sondyqtan, biz osy seriktestik sekildi shaǵyn jáne orta bıznes ókilderin odan ári kóbeıtip, otandyq ónimder túrin kóbeıtýimiz kerek», - dedi Janseıit Qanseıituly.
Aıta ketý kerek, óz jumysyn 1998 jyly bastaǵan jergilikti «Altyn dán» kásiporny el naryǵynda un jáne sút ónimderin óndirýde kóshbasshylardyń qatarynda. Seriktestikte jylyna 8 myń tonnaǵa jýyq makaron, 981 tonna sút, 154 tonna un ónimderi óndirilse, un ónimderiniń 60 paıyzy kórshiles memleketterge eksporttalady.