Búkilálemdik boks serııasynyń (WSB) 2017 jylǵy jańa maýsymy bastaldy. Osy jobaǵa alǵashqy maýsymnan beri úzdiksiz qatysyp kele jatqan elimizdiń «Astana Arlans» klýby Reseıde jergilikti «Patriot Boxing Team» klýbyn 3:2 esebimen utty.
Halyqaralyq áýesqoı boks federasııasy uıymdastyrǵan bul jarysqa qatysatyn komandalar sany bıyl qysqarǵan. Qazaqstandyq jankúıerlerge jaqsy tanys Ýkraına, Ázirbaıjan, Polsha, AQSh, Pýerto-Rıka komandalary bıylǵy dodadan tys qaldy. Sondyqtan, ózge qatysýshy komandalar qurlyq boıynsha úsh topqa bólingen. Pleı-off básekeleri bastalǵansha muhıt asýdyń keregi joq. Meksıka, Argentına, Kýba komandalarymen ázirge jolyqpaımyz. Álemdik qarjylyq daǵdarys kezinde bul ekonomıkalyq turǵyda únem bolatyny anyq.
Qazaqstannyń «Astana arlandary» komandasy S tobyna túsken. Bizdiń topta Reseıdiń «Patriot Boxing Team», Qytaıdyń «Chaına Dragons» jáne О́zbekstannyń «О́zbek Taıgers» klýbtary bar.
О́tken senbi kúni jerlesterimiz alǵashqy kezdesýin ótkizý úshin Máskeýge bardy. Sharshy alańda «S1» dárejesindegi boksshylar judyryqtasty.
Bul boks keshi biz úshin asa sátti bastala qoımady. Eń jeńil salmaqtaǵy Temirtas Júsipov qarsylasy Bator Sagalýevten utylyp qaldy. Birjan Jaqypov ketkennen keıin 49 kılodaǵy tájirıbeli degen boksshymyzdyń 2015 jylǵy Eýropa oıyndarynyń jeńimpazyna shamasy jetpedi.
Esesine jaqynda salmaq aýystyrǵan 56 kılodaǵy astanalyq Ilııas Súleımenov senimdi aqtady. Ol upaı sany boıynsha Artem Hotenovtan basym tústi.
Odan keıin Reseı quramasy ekinshi ret alǵa shyqty. «Arlandardyń» 64 kılodaǵy óreni Dilmurat Mıjıtov Radımır Abdýrahmanovtan jeńilip qaldy.
Pavlodarda ótken el chempıonatynda jeńiske jetken 75 kılodaǵy tarazdyq Ábilhan Amanqul 20 jastaǵy Radjab Radjabovty aıqyn basymdyqpen jeńip, jalpy esepti teńestirdi. Negizi Radjabov ta osaldardyń qatarynan emes. Habarovskide ótken halyqaralyq týrnırde álem chempıonatynyń qola júldegeri Artem Chebotarevtiń ózin utqan bolatyn.
Sońǵy sheshýi kezdesý 91 kılodaǵy boksshylardyń arasynda ótti. «Arlandardyń» namysyn Anton Pınchýk qorǵady. Azııa oıyndarynyń jeńimpazy reseılik Ilıa Kvasnıkovqa esh múmkindik bermedi. Sóıtip, «Astana Arlans» 3:2 esebimen jeńiske jetti.
Al bizdiń toptaǵy ekinshi jupta Qytaıdyń «Chaına Dragons» komandasy óz jerinde ózbekterdi dál osyndaı eseppen utty.
Aıta keteıik, jańa maýsym aldynda komandanyń burynǵy boksshylary men bapkerleri klýbty sotqa bergen edi. Sebep bireý. Osydan eki jyl buryn «Astana arlandary» ekinshi ret Búkilálemdik boks serııasynda chempıon atanǵan. Jeńimpaz klýbtyń esepshotyna Halyqaralyq áýesqoı boks federasııasy (AIBA) 400 myń dollar aýdarǵan edi. Biraq basshylyq bul aqshany syıaqy retinde úlestirýdi jón kórmegen. Boksshylar men klýb arasynda maýsym basynda ondaı kelisimshart ta bolmaǵan eken. Máseleni ózara sheshe almaǵan soń, 24 adam sotqa júgindi. Olardyń arasynda bapker Beıbit Esjanov jáne boksshylar Erik Áljanov, Samat Bashenov, Mardan Berikbaev, Jomart Erjan, Muhamedjan Erkin, Qaırat Eralıev, Mıras Jaqypov, Nurdáýlet Jarmanov, Erjan Musafırov, Zákir Safıýllın, Meıirbolat Toıytov bar.
Boksshylar syıaqydan bólek «Astana Arlans» klýbynan árqaısysyna 200 000 myń teńge kóleminde moraldyq shyǵyn óteýin talap etken edi. Biraq sot olardyń ótinishterin qanaǵattandyrǵan joq. Anyǵyn aıtqanda, boksshylar sotta jeńilip qaldy.
«Astana» kásibı prezıdenttik klýbynyń atqarýshy dırektory Amanbek Kúlshikov boksshylar men bapkerlerdiń aldynda eshqandaı qaryzymyz joq dep otyr. Barlyǵyn kelisimshart boıynsha tólegenin málimdedi.
Jalpy, bıylǵy maýsymda «Astana Arlans» klýbynyń quramyna 20 boksshy engen. Degenmen, komanda bapkerleri rezervtik quramǵa 19 boksshy alyp otyr. Jetinshi maýsymda «Astana Arlans» kapıtany bolyp, 52 kılo salmaqtaǵy Oljas Sáttibaev saılanǵan bolatyn.
Bek Tóleýov