36 jastaǵy Gennadııdiń týmysynan aıaǵynyń qan tamyrlary zaqymdanyp, múgedek bolyp qalǵan edi. Qudaıǵa qulshylyq etetindikten, anda-sanda Qazan qalasyndaǵy qasıetti jerlerge táý etip qaıtatyn ádeti bar. Byltyr 2 qazanda kezekti minájat saparyna attanyp, kópke deıin habar-oshar bolmaǵanyna alańdaǵan týystary polısııaǵa qaırylǵan. Izdestirý sharalary barysynda Reseıde qamalǵany anyqtalady. Ol týraly Esil aýdanynda turatyn ákesi Leonıd Poltaves áńgimelep berdi.
– Qaıtar jolda ulym barlyq qujattary men aqshasyna qosa uıaly telefonyn da urlatyp alǵan. Jeke basyn kýálandyratyn aıǵaq bolmaǵandyqtan Soltústik Qazaqstan oblysymen shekaralas Qorǵan qalasynda ýaqytsha ustaý oqshaýlaǵyshyna jaýyp tastaǵan. Mundaǵylar tez bosaıtynyna sendirgenimen, birneshe aı ustaǵan. Onyń sebebin Qazaqstannyń konsýldyǵyna jiberilgen ótinimge jaýap hattyń keshigýimen túsindirgen. Biryńǵaı ekonomıkalyq odaq túzilgeli eki el arasynda kidirissiz júrip-turý da, hat-habar alysý rásimderi de áldeqaıda ońaılanǵany belgili. Meni qos tarap jaýapty oryndarynyń múgedek jannyń taǵdyryna degen nemquraıly kózqarasy qynjyltady.
Gennadııdiń elge degen saǵynyshty sezimi shekaraǵa kelgende taǵy da sý sepkendeı basylǵan. Onyń bul áreketine shekarany zańsyz kesip ótti degen qylmystyq aıyp taǵylyp, biraz ýaqyt kidirýine týra kelgen.
Leonıd Aleksandrovıchpen keıin habarlasqanymyzda, ulynyń aman-esen kele jatqanyn qýana jetkizdi.
О́mir ESQALI, «Egemen Qazaqstan»
Soltústik Qazaqstan oblysy