«Medeý» múmkindikter bergen edi...

«Medeý» «Medeý» bolǵaly qazaqstandyq sportshylar Ýnı­versıada syndy alaman jarysqa alǵash ret at salysqanymen, rekord jańǵyrta almady. Konkımen júgirýshi Ekaterına Aıdo­vanyń eki márte alǵan qola medaline maldandyq. Barlyǵy 23 elden kelgen 170 konkıshiniń arasynda, tipti, bizdiń sportshylarymyz qalyń shańnyń arasynan kórinbeı qaldy. О́kinishti-aq... Búgin ataqty muz aıdynynda konkı jarysynan mass-starttan sońǵy jarystar ótti. Júldesizbiz... Biz bıik taýdaǵy «Medeý» sport kesheniniń ýnıversıadalyq oıyndarǵa baılanys­ty bas menedjeri Dýlat KEIKINDI áńgimege tartqan edik. – Dýlat Járdemuly, qazaq jerinde alǵash ret ótkizilip turǵan halyqaralyq qysqy jarysta «Medeý» sport keshe­niniń joly bolmady ma, álde sportshylardyń asyǵy alshysynan túspeı qoıdy ma? – Bıik taýdaǵy «Medeý» sport kesheniniń «Rekordtar ustahanasy» degen aty bar. 1972 jyldan beri osy muz aıdynynda 120 ret álemdik rekord jańartyldy. Ony Jer shary moıyndaǵan, endeshe, buǵan aıdynnyń esh qatysy joq. Negizi, «Medeý» múmkindikter bergen edi... – Ol kezdegi «Medeý» men qazirgi «Medeýdi» salys­tyrýǵa bola ma? – Árıne, bolady. Muz aıdynyna qashan da keshen janyndaǵy sý qoımasynan móldiregen taý sýy quıylyp, muz qatyrylady. – Alataýdyń muzdaq­tarynan túzilgen ol sýdyń sport­qa qan­daı qatysy bar, sportshyǵa mańy­zdysy qat­qan muz emes pe? – Muzdaq sýy kirshiksiz, tipti, onyń quramynda kádimgi biz iship júrgen sýdyń quramyndaǵy birtalaı mıneraldy qospalar da joqtyń qasy. Mundaı muzda sportshy da juldyzdaı aǵady. Konkı men muz arasyndaǵy úı­kelis meılinshe jeńildeıdi. Muny konkıshilerimiz de jaqsy biledi... – «Medeý» sport kesheni aıdynynyń basty ereksheligi osy ǵoı sonda? – Iá, basty ereksheligi muz­dyń krıstaldaı tazalyǵynda. Árıne, onyń bıik taýdyń qoınaýynda ornalasqanynyń da sebebi zor. – Endeshe, dúnıejúzilik qys­qy sport saıysynda «Me­deýde» nege jerlesterimiz júl­desiz qaldy? – Rekordty sportshy jasaıdy, keshen – tirkeıdi. Jeńis – sportshynyń qandaı daıyndyqpen kelgenine baılanysty. – Konkımen jarysýshylar saıysy bastalǵanda, Me­deý shatqalynda japa­laqtap qar jaýdy. Bizdiń sport­­shyla­rymyzǵa tabı­ǵattyń tosyn osy qu­by­lysy qatty áser etti degenge ne aıtar edińiz? – Shırek ǵasyrdan astam ýaqyt osynda jattyǵatyn sport­shylarmen jumys istedim, «Medeý» sport kesheninde qyz­met atqardym. Meniń bile­tinim, kerisinshe, týǵan jerdiń kıesi sportshylardy qoldaıdy dep jatady. – Deıturǵanmen, taý shat­qalyndaǵy tópelep jaýǵan qar qyrsyǵyn az tıgizbegen shyǵar? – Men muzdatý tehnolo­gııasynyń ınjenerimin. Bul suraǵyńyzǵa elimizdiń konkımen syrǵanaýshylar qura­masynyń bas bapkeri, ataqty konkıshimiz Lıýdmıla Pro­kashevanyń jaýap qaıtarǵany durys dep oılaımyn. – Bas bapker japalaqtap jaýǵan qardyń astynda turyp, qazaqstandyqtardyń úkili úmi­tindeı bolǵan Ekate­rına Aıdo­vaǵa qatysty «Aýa raıy neǵur­lym qolaısyz bolsa, bizge solǵurlym tıimdi», dep edi. Biz kýámiz... – Sporttyń qýanyshy men ókinishi qatar júredi. Eń bastysy – álemdik ýnıversıada sportshylaryna «Medeý» ádettegideı jyly qabaq tanytty. Davıde Djotto (Italııa) men Aleksandra Kachýrkına (Reseı) altyn, Seıtaro Ichınohe men Nana Takahashı kúmis, Lınýs Haıtdegger (Avstrııa) qola medaldi eline osy jer­den alyp ketti ǵoı. Bas jat­­tyqtyrýshy aıtqandaı tabı­ǵat, ıaǵnı, «Medeý» bizdiń sport­shy­larymyzǵa hal-qaderinshe kómektesti... – Áńgimeńizge rahmet. Áńgimelesken Talǵat SÚIINBAI, «Egemen Qazaqstan» ALMATY