Biz biletin Federer men Ýılıams

Álemdik sporttaǵy jyldyń eń alǵashqy jarysy máresine jetti. Jasyl qurlyqtaǵy tennıs dodasynyń jeńimpazdary da anyqtaldy. Erler arasynda shveısarııalyq Rodjer Federer, al áıelder synynda amerıkalyq Serena Ýılıams jeńis toıyn toılady. Bul jolǵy Australian Open týrnırin eki qurdastyń (ekeýi de 35 jasta) ózge tennısshilerge arnalǵan sheberlik synyby dersiń. Melbýrnde kópshilik bu­rynǵy Federerdi kórdi. Jı­naqy, soqqylary dál ári jyl­­dam. Munyń bári oǵan fı­nal­ǵa alqynbaı jetý úshin jet­kilikti edi. Alqynbaı degende, tórtinshi aınalymda japon Keı Nısıkorımen, al jartylaı fınalda jerlesi Sten Vav­rın­kamen ótken oıyndar bes setke sozylǵanymen, bul match­tardan soń da Rodjerdiń kortqa qaıta shyǵýǵa daıyn ekeni baıqaldy. Degenmen, fınalda ony eń yńǵaısyz qar­sylas ıspan Rafael Nadal kútip turdy. Yńǵaısyz bolatyny, shveı­sarııalyq ıspan ten­nısshisin Ýımbldonnan bólek Úl­ken dýlyǵa sanatyndaǵy doda­larda utqan emes. Aǵylshyn je­­rinde eki ret qana ústemdik ta­nytqan eken (2006 jáne 2007 jyl­­dary), onyń ózinde sońǵy je­­ńisiniń arasyn 10 jyl bólip tur... Fınaldyń alǵashqy jáne úshinshi setteri sol baıaǵy táji­rıbesi tolysqan Federer men ataqty shveısarııalyq ten­nısshige qarsy oınaýdy endi meńgere bastaǵan Nadal kez­desýin eske saldy. King Roger (laqap aty – avtor) soqqy­lary­nyń jyldamdyǵy men kúshine ıspan jigiti tótep bere almaı, dopty kózben shyǵaryp salýmen boldy. Biraq Rafa óziniń de «Korol» degen ataǵy esine túskendeı, boıyn tiktep, ekinshi jáne tórtinshi setterde tizgindi qolǵa aldy. Saýatty qımyldap, qarsylasynyń da kemshilikterin paıdasyna asyra bildi. Tarazy basy teńesti. Bul – jankúıerler úshin naǵyz drama. Nadaldiń besinshi setti senimdi bastaý­y Federerdi qorqyta almady: shveısarııalyq sabyrly qalpynan tańǵan joq. Mine, biz biletin Rodjerdiń Melbýrndegi sheshýshi kezeńde top jarýyna dál osy ustamdylyǵy kómek­teskendeı. Osylaısha 3 saǵat 37 mınýtqa sozylǵan oıyn 6:4, 3:6, 6:1, 3:6, 6:3 esebimen ba­zel­­dik jigittiń paıdasyna she­shil­di. Sonymen, Úlken dýly­ǵada­ǵy 18-shi, al Avstralııa ashyq birin­shiligindegi 5-shi jeńis qolda! Al áıelder synynda aq­tyq synǵa apaly-sińlili Ýılıams­terdiń shyǵýy kútpegen jaǵdaı boldy. Byltyrǵy maý­symdy sátsiz ótkizip, tipti álem­niń birinshi raketkasy ataǵyn nemis qyzy Angelık Kerberge bosatyp bergen Serena Avstra­lııada kóshbasshylardyń qata­rynda bolǵanyn joqqa shyǵar­maımyz. Degenmen, odan bir jas úlken Vınýs menmin degen sportshylardyń ózin shań qaptyryp ketedi dep kópshilik kútken joq. Osylaısha myqty­lardyń bárin birinen soń birin jarystan shyǵarǵan amerıkalyq tennısshiler jyldy sátti bastap otyr. Osyǵan qarap bul ekeýiniń ýaqytqa baǵynbaıtyn ereksheligi bar ma deısiń. Australian Open aldynda kishi Ýılıams Oklendtegi týrnırde álemniń 69-shy raketkasy Medıson Brenglden uty­lyp qalyp, tórt aı boıy jarys­tarǵa qatysqan joq. Bul jaıt Se­renanyń juldyzdy shaǵy ótti degenderdiń sózin naqty­laı túskendeı boldy. О́zi de tilshilerdiń sporttyq ǵumy­ry týraly saýaldaryna «Bári aqpanda belgili bolady» dep jaýap qatýy amerıkalyq sport­shynyń tennısten ketý jaıly oılap júrgenin ańǵartqandaı edi. Onyń ústine jyl sońynda tur­mysqa shyǵatynyn da jarııa­laǵan. Sińlisiniń qulshynysy Vı­nýs­ke de shabyt bergen tá­rizdi. Serenanyń eńbekqor­lyǵy jiger­lendiretinin qa­shan da aıtyp júretin ol qarsy­las­tarynyń jastyǵyna da, Shegren sındromyna (ta­myr­dyń tartyp aýrýy) da qara­mastan, ekeýiniń Úlken dý­lyǵadaǵy ózara toǵyzynshy kez­desýine nyq qadammen jetti. Tipti, jeńisten úmitti ekenin ańǵar­typ, juptyq syndaǵy jarysyn jalǵastyrýdan da bas tartty. Alaıda, bul Serenany toq­tatý múmkin emes bolatyn. Sheshýshi oıynda Vınýs qan­sha tyrysyp baqqanymen, Sere­nanyń sońynan qýyp jete almady... Bul – kishi Ýılıamstiń sport­tyq karerasyndaǵy 23-meıd­jory. Sonymen, Shteffı Graf­tyń nátıjesi artta qaldy. Serenanyń endigi maqsaty – jekeleı synda 24 ret jeńiske jetken Margaret Korttyń rekordyn buzý. Myna qarqynmen bul meje bıyldan qalmaı oryndalýy da múmkin. Mundaıda «Oralýyńmen, Kort hanshaıymy», degiń-aq keledi. Tek Sere­nanyń sózi toqtaý bolady. «Men oralý degen sózdi unat­paımyn. Sebebi, tennısten eshqashan ketken joqpyn», – deıdi. Endeshe, tennıs álemi de senimen qoshtasýǵa asyǵar emes, Serena. Madına ASYLBEK ASTANA