Semeı qalalyq máslıhatynyń depýtaty Ámirjan Ahmedjanovtyń aıtýynsha, búginde mektepte bala kóp, al eden jýatyn adam tapshy. Talap boıynsha 10 shtattyq birliktiń ornyna 5 adam ǵana jumys istep júr. Bir eden jýýshy eki adamnyń jumysyn atqarýǵa májbúr. Al qalalyq ekonomıka jáne bıýdjetti josparlaý bóliminiń jetekshisi Gúljan Altynbekova bul máseleni bylaı dep túsindirdi:
– Mektepter boıynsha osydan úsh jyl buryn 600 tehnıkalyq qyzmetker jetispeıtin. Bilim bóliminiń mamandary bul suranysty jyl saıyn birtindep qamtyp keledi. Áli de 300 adam qajet. Birden aqsha bólýge múmkindigimiz joq. Sondyqtan jyl saıyn bul máseleni nazarda ustaımyz.
Semeı qalalyq bilim bólimi basshysynyń orynbasary Sara Eleýsizovanyń aıtýynsha, ázirge mektepterge 493 tehnıkalyq qyzmetker bólinipti. Keler jyly 139 shtat berilmek. Depýtattar jańa jumys ornyn kútip otyrýǵa bolmaıtyndyǵyn, adam kóp shoǵyrlanǵan mektepterde tazalyq bolýy kerektigin aıtyp atalǵan jaǵdaıdy tezirek sheshýdi usyndy.
Raýshan NUǴMANBEKOVA,
jýrnalıst
SEMEI