Ortalyq kommýnıkasııalar qyzmetinde Elbasy Nursultan Nazarbaevtyń Qazaqstan halqyna Joldaýyna arnalǵan brıfıng ótti. Onda Kásipodaqtar federasııasynyń tóraǵasy Ábilǵazy Qusaıynov «Úshinshi modernızasııa» Joldaýy aıasynda kásipodaqtar úshin basymdyqtardyń biri bolyp sanalatyn jańa jumys oryndaryn qurý másele týraly aıtty.
Jıynda ol Memleket basshysynyń Qazaqstan halqyna Joldaýynda atap ótken Onlaın-tehnologııalar men «Sıfrly Qazaqstan» baǵdarlamasynyń jastarǵa ózderiniń bilimderi men biliktilikterin tolyǵymen paıdalanýǵa múmkindik beretinin, óıtkeni qazirgi kezde elimizde jumys oryndaryn saqtap qalý óte ózekti máselege aınalyp otyrǵanyn jetkizdi.
-Búginde barlyq elderde qarjy-ekonomıkalyq daǵdarys bolyp jatyr. Ol birneshe jyldan beri jalǵasyp keledi. Daǵdarys bizdiń elimizdi de aınalyp ótken joq. Ekonomıkalyq daǵdarys qazirgi kúnniń eń basty problemasyna aınalyp otyr. Osyǵan baılanysty elimiz jumys oryndaryn saqtaý máselesimen aınalysýda. Mysaly, Eýropanyń Italııa, Grekııa sııaqty memleketterinde jastar arasynda jumyssyzdyq 23 paıyzǵa jetti. Al bizdiń elimizde Elbasynyń reformalarynyń arqasynda jumyssyzdyq deńgeıi 5 paıyzdy ǵana kórsetip tur. Prezıdenttiń bıylǵy Joldaýy osy máseleni túbegeıli sheshýge arnalǵan, - dedi ol.
Sonymen birge ol elimizde shaǵyn jáne orta bıznestiń arqasynda kóptegen azamattar jumys oryndaryn ashýǵa múmkindik alǵanyn, sonyń nátıjesinde mıllıondaǵan otandastarymyz «eki qolǵa bir kúrek» alyp, óziniń kásibimen aınalysyp jatqanyn atap ótti. «Qazirgi tańda elimizde 3,3 mln adam jaldamaly jumyspen aınalysýda. О́nerkásip, óndiris, kólik-logıstıka salasynda jumys oryndaryn saqtaý isi jalǵasyp jatyr. Budan basqa 20 000-nan astam jańa jumys oryndary paıda boldy. Al «Nurly jol» baǵdarlamasyn aıasynda 4,400 shaqyrym jol salynýda. Eger 100 km-ge 1000 adam jumys istese kóptegen azamattardyń eńbektenip jatqanyn kórýge bolady. Elimizde kásipkerlikti damytýda qolda bar múmkindiktiń bári jasalyp otyr. Mysaly, Joldaýǵa sáıkes endi adamdar óz násibin kásibinen tapqysy kelse 16 mln teńge kóleminde nesıe alady. Osynyń bári otbasylyq bıznespen aınalysýǵa múmkindik berip tur», - dedi Á.Qusaıynov.
Sol sııaqty ol brıfıngte Kásipodaqtar federasııasynyń qyzmetine toqtalyp, qazirde kásipodaq músheleriniń úshten biri jastar ekenin, barlyq aımaqtarda «Keleshek» jastar keńesteri belsendi jumys atqaryp, olar jańa jumys oryndaryn qurýǵa óz úlesterin qosyp jatqanyn atap ótti. «Máselen, Qostanaı oblysynda «Keleshek» kásipodaq jumyskerleriniń balalary úshin jańa balabaqsha ashyldy», – dep málimdedi federasııa tóraǵasy.
Onyń aıtýynsha, tek sońǵy eki jyl ishinde kásipodaqtar músheleriniń sany 116 myńnan astam adamǵa kóbeıgen. Sondyqtan da jastardy jumyspen qamtý kásipodaqtardyń mańyzdy mindetteriniń biri bolyp qala beredi.
Atap óter jáıt, Memleket basshysynyń bastamasymen uıymdastyrylǵan konstıtýsııalyq reformalar aıasynda Kásipodaqtar federasııasy kásipodaqtar qatarynda da reforma júrgizýdi josparlaýda. Eń bastysy munda basymdyq kadrlardy jańartýǵa beriledi.
Dastan KENJALIN, «Egemen Qazaqstan»