Qazaqstannyń Tájikstandaǵy elshisi Nurlan Seıtimov «Rohı ohanı Tochıkıston» MBK bastyǵy («Tájikstan temir joly») Komıl Mırzoalımen kezdesti, dep habarlady QR Syrtqy ister mınıstrligi.
«Kezdesýde eki eldiń ókilderi temirjol salasyndaǵy, sonyń ishinde Tájikstanǵa qazaqstandyq «Evolution» lokomotıvterin jetkizý boıynsha ekijaqty ózara is-qımyl máselelerin talqylady», - delingen habarlamada.
Tájikstandyq tarap tájik temir jolynyń qajettilikteri úshin Qazaqstanda óndirilgen temirjol mashına jasaý salasy ónimderiniń, birinshi kezekte relster men jartylaı vagondardyń jetkizilýine múddeli ekenin bildirdi. Taraptar 2017 jylǵy 15-16 aqpanda Astana qalasynda ótetin Qazaqstan Respýblıkasy men Tájikstan Respýblıkasy arasyndaǵy ekonomıkalyq yntymaqtastyq jónindegi úkimetaralyq komıssııanyń 13-shi otyrysy temirjol salasyndaǵy yntymaqtastyqqa qosymsha serpin beretinine senim bildirdi. Áńgime sońynda qazaqstandyq dıplomat Komıl Mırzoalıge kezdesý úshin alǵys aıtyp, strategııalyq áriptestik rýhynda Qazaqstan-Tájikstan qarym-qatynastaryn nyǵaıtýda jemisti yntymaqtastyq jasaýǵa daıyn ekenin jetkizdi.