QR Úkimeti 2017 jylǵa arnalǵan bıýdjet parametrlerin qaıta qaraıdy. Bul týraly jarty jylǵa negizdelgen jumys josparyn tanystyrý barysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.
«Birinshi baǵyt aıasynda (Ishki jalpy ónim ósimine qol jetkizý) bıýdjettiń úılestirilýin retteý maqsatynda aqpanda áleýmettik-ekonomıkalyq boljam men 2017 jylǵa arnalǵan respýblıkalyq bıýdjettiń parametrleri qaıta qaralady», - dedi mınıstr Úkimet otyrysynda.
Onyń sózine qaraǵanda, 2017 jylǵa negizdelgen aldyn ala parametrler daıarlandy.
Aıta keteıik, jalpy basty 9 baǵyt boıynsha 148 is-shara josparlanǵan. Onyń ishinde ishki jalpy ónim ósimine qol jetkizý, jeke sektordy damytý jáne básekelestikti kúsheıtýge jaǵdaı jasaý, jeke ınvestısııany tartýǵa basymdyq bere otyryp, ekonomıkany qarjylandyrýdy qamtamasyz etý, jappaı kásipkerlikti damytý arqyly turǵyndardyń tabysyn arttyrý sharalary eskerilgen.
Sonymen qatar adam kapıtalyn damytýǵa baǵyttalǵan reformalardy tereńdetý, jumyspen qamtý men jumys oryndaryn ashý, memlekettik qyzmetterdiń tıimdiligin arttyrý, halyqaralyq ındeksterde memlekettiń reıtıngin joǵarylatý eskerilip otyr.