Qazaqstan atynan Ǵalymjan Áýesbaı esimdi akrobat Qytaıdaǵy Reality Show Talent shoýyna qatysyp jatyr.
«YouTube-ten túrli vıdeolardy kórip, arnaıy kitaptardy oqıtynmyn. Osylaısha, bilgenimshe daıyndalatynmyn. Aspanasty elindegi jarysqa qatysý týraly ıdeıany tanystarymnyń biri aıtty. Kóp keshiktirmeı, uıymdastyrýshylarǵa ózim jaıly málimetterdi, vıdeolarymdy jiberdim. Arada kóp uzamaı baıqaýǵa qatysýǵa shaqyrdy», – dedi Ǵalymjan Áýesbaı.
Baıqaýdyń alǵashqy kezeńi 2016 jyly qyrkúıek aıynda Úrimshi qalasynda ótken. Bul synda Ǵalymjan bes oryndyqtyń kómegimen óner kórsetken. Qazylar alqasy biraýyzdan kelesi kezeńge joldama bergen bolatyn. Al qarasha aıyna uıymdastyrylǵan baıqaýda on bir oryndyqpen qolynan keletin ónerin pash etti.
«Baıqaýdyń úshinshi kezeńi aqpan aıynyń ortasynda ótedi. Tórt shyny bótelkege tórt oryndyqty qoıyp, onyń ústine taǵy tórt bótelke men tórt oryndyqqa shyǵyp, talantymdy kórsetýdi josparlap otyrmyn», – dedi akrobat.
Reality Show Talent shoýynyń jeńimpazy tórt kezeńnen keıin anyqtalady.
Ońtústik Qazaqstan oblysynda týǵan ol búginde Júrgenov atyndaǵy Qazaq ulttyq óner akademııasy teatr fakýltetiniń 3-kýrs stýdenti. Akrobatıkaǵa degen qyzyǵýshylyǵy tek joǵary oqý ornyna túsken soń ǵana artqan.