Elordadaǵy Ulttyq akademııalyq kitaphanada Halyqaralyq túrki akademııasynyń uıytqy bolýymen jıyn ótti. Túrki tildes halyqtardyń Atajurty sanalatyn Qazaqstan Astanasyndaǵy jıynǵa qazaq zııalylarymen qatar, batys pen shyǵystan, tústik pen teriskeıdegi túbi bir týys halyqtardyń zııaly qaýym ókilderi qatysty. Otyrys barysynda «Joıylý qaýpindegi túrki tilderi» atty kóptomdyq eńbektiń tusaýy kesildi.
IýNESKO-nyń sheshimimen «Halyqaralyq ana tili kúni» dep jarııalanǵan 12-aqpan qarsańynda basylyp shyqqan bul súbeli eńbek Q.A.Iаssaýı atyndaǵy Halyqaralyq qazaq-túrik ýnıversıtetiniń qoldaýymen jaryq kórgen. Túrkııalyq professor Sýer Ekerdiń ǵylymı jetekshiligimen iske asqan jobaǵa álemniń 26 elinen 130 ǵalymnyń 132 zertteýi toptastyrylǵan. Al maqalalar aǵylshyn, túrik, orys, qazaq, ózbek jáne basqa da tilderde jazylǵan.
Túrli-tústi fotosýrettermen kórkem bezendirilgen kóptomdyqty oqyrman qaýymǵa tanystyrǵan akademııa basshysy týys halyqtardyń tamyryna qan júgirtetin mundaı týyndyny basyp shyǵarý bastamasy IýNESKO-nyń arnaıy baǵdarlamasy aıasynda oryndalyp otyrǵandyǵyn atap ótti.
Shara aıasynda sóz alǵan Q.A.Iаssaýı atyndaǵy Halyqaralyq qazaq-túrik ýnıversıtetiniń О́kiletti keńes tóraǵasy, professor Musa Iyldyz ben Bashkent ýnıversıtetiniń professory, joba jetekshisi Sýer Eker kitaptyń jazylý tarıhyn áńgimelep, taǵdyrly tilderdi zertteý men qorǵaý jaıly paıymdy pikirlerimen bólisti. Áńgime barysynda jınaqqa zertteýleri engen mamandardyń álemniń túrli elderi men san túrli ýnıversıtetterinde, ǵylymı uıymdarynda jumys isteıtini belgili boldy. Al olardy taýyp, tanyp, ujymdyq eńbekke jumyldyrýda baılanys tetigi retinde áleýmettik jelilerdiń ózin ájetke jarata bilgen.
«Máselen, biz osy kitapqa materıaldar ázirleý barysyndaǵy sońǵy bes jyl ishinde baılanys quraly osy eken telefonmen ǵana shektelgen joqpyz. Hat, habar almasýda elektrondy poshtany bylaı qoıyp, áleýmettik jelilerdiń ishindegi feısbýktyń ózin paıdaǵa jarattyq. Sonyń nátıjesinde álemge tarydaı shashylǵan túrki tildes halyqtardyń ókilderinen bas-aıaǵy 10 myńnan astam derekter jınaldy», – dedi S.Eker.
Sondaı-aq, alqaly jıynda týys halyqtardyń atynan tilektestigin bildirip, sóz sóılegender qatarynda memleket qaıratkeri Myrzataı Joldasbekov pen Astanada Túrki keńesi aqsaqaldar keńesiniń múshesi Ádil Ahmetov burynǵy túrik dáýiriniń asqaq órkenıet bolmysyn tanytatyn zertteýlerdiń búgingi bútin Túrki álemi úshin zor mańyzǵa ıe ekenin aıtty.
Nurlybek DOSYBAI, «Egemen Qazaqstan»
Sýretterdi túsirgen Erlan Omarov