Aıagózde búrkitshiler básekesiniń jeńimpazdary anyqtaldy

Kók táńirisin qolǵa úıretken qazaqtyń qyran jigitteri eki kún boıy ańyzdar men abyzdar eli Aıagózdi dúbirge bóledi. Aqtamberdi týǵan topyraqta qyrandarmen birge ulttyq rýhymyz qalyqtaǵandaı boldy. Eki kúnge sozylǵan búr­kit­shilerdiń básekesine eli­mizdiń Almaty, Aqmola, Aty­raý, Jam­byl, Qaraǵandy, Pavlodar, Ońtústik Qazaqstan, Soltústik Qazaqstan, Shyǵys Qazaqstan oblystary men Astana qalasynan 37 búrkit pen 6 qarshyǵa, uzyn sany 43 qus qatysty. Buǵan deıin ótken el birinshilikterinde mundaı kórsetkish tirkelmegen eken. О́zderi ańshy, ózderi búrkit­shi, ózderi aqyn, bir sózben aıtqanda, segiz qyrly, bir syrly úrjarlyq Táttimbet Kápuly men Erzat Baıqadamov syndy ultjandy azamattardyń uıymdastyrýymen, óner janashyry, mesenat Ánýar­bek Bımýrzınniń qarjylaı qol­daýymen ótken qusbegiler báse­ke­si­niń alǵashqy kúninde qy­ran­­nyń ba­byn baıqaıtyn qusty qolǵa sha­qyrý, erkin ushyrý, shyrǵa salý sekildi saıystar ótkizilse, ekinshi kúni irikteýden irkilmeı ótken búr­kitter qoıan men túlkige tústi. Saıysqa qatysýshylardyń jas jaǵynan eń úlkeni – Almaty ob­lysynyń Sar­qan qa­la­synan kelgen 75 jas­taǵy Tálimbek Aısabekuly aqsaqal. Eń jasy – Jam­byl ob­ly­synyń Merki aýdanynyń týmasy, 17-degi Baǵdáýlet Babajan. Tálimbek aqsaqaldyń búrkit­shilikpen shuǵyldan­ǵanyna 40 jyldan asypty. Osy jyldar muǵdarynda 4-5 kók táńirisin qolǵa úıretipti. – Birin 7-8 jyl, ekinshisin 10 jyl shamasynda ańǵa saldyq. Bizdiń babalarymyz 30-33 jyl túletken eken. Biz endi ol kisilerge jete almaspyz. Jete almasaq ta, izin basyp kele jatyrmyz. Balalardy tárbıelep júrmiz, – deıdi búrkitshi qarııa. Eki kúngi saıysta baby men baǵy qatar kelisip, ónerimen jurttyń aıyzyn qandyrǵan qyrandar da boldy. Alty kún jol júrip, Atyraýdan kelgen Arman Qoshqarovtyń «Naryn», qaraǵandylyq Temiráli Japa­rovtyń «Muz­balaq», aqmolalyq Qanat Shú­lenbaevtyń «Saq­tan», tarazdyq Baýyrjan Imanqu­lovtyń «Qarajan», astanalyq Kúntýǵan Armanbektiń «Aqba­laq» atty búrkitteriniń babynda ekenin kórdi kópshilik. Jarys qorytyndysynda pavlodarlyq Baqytjan Muqa­shevtiń «Naızasy» 1-oryndy, Almaty oblysynan kelgen Murat Kódekovtiń «Aqjoly» 2-oryndy, atyraýlyq Arman Qoshqarovtyń «Naryn» at­ty búrkiti 3-oryndy ıe­len­di. Qar­shyǵashylar báse­kesinde jam­byldyq Ba­­bajan Baǵdáýlet 1-orynǵa, Almaty ob­­ly­­synyń týmasy Aıan Seıitjan 2-orynǵa, aq­mo­­la­lyq Ábsá­lam Qa­zy­­­baı 3-orynǵa laıyq dep ta­nyl­­dy. Azamat QASYM, «Egemen Qazaqstan» Shyǵys Qazaqstan oblysy Sýretti túsirgen avtor