Elordadaǵy Ulttyq mýzeıde ótken «Elbasynyń Úndeýi – jańarýdyń jańa qadamy» atty dóńgelek ústelde memleket jáne qoǵam qaıratkerleri, tarıhshy ǵalymdar men mádenıet salasy ókilderi Úndeýge baılanysty oılaryn ortaǵa saldy.
Dóńgelek ústelde respýblıkalyq Ardagerler keńesi tóraǵasynyń birinshi orynbasary О́mirzaq Ozǵanbaev Joldaýdaǵy bes basymdyqtyń ishinde eń aldymen adam faktory, adamı kapıtal máselesine nazar aýdardy. Ultymyzǵa tán eń jaqsy qasıetterdi damytyp, tereńnen nasıhattaı alǵanda qoǵamda oryn alǵan kóptegen teris áreketterdiń joıylatynyna mán berdi. Ekinshiden, jas urpaqtyń eńbekke degen kózqarasyn ózgertý kerek degen oıyn aıtty. Ardagerler keńesi tóraǵasynyń orynbasary, ásirese, jastardyń óz sharýasyn ózi istemeı, jaldamaly jumysshylarǵa istetetinderine qynjyldy. Úshinshiden, «Bolashaq» baǵdarlamasy boıynsha osy ýaqytqa deıin oqyǵandardyń kóbi dıplomat, ekonomıst mamandyqtaryna basymdyq bergenin aıtyp, endigi jerde tehnıka, IT tehnologııa mamandyqtaryna basymdyq berilse degen pikirin bildirdi.
Memleket tarıhy ınstıtýtynyń dırektory, tarıh ǵylymdarynyń doktory, professor Búrkit Aıaǵan Úndeýdiń negizgi ıdeıasy retinde bıliktiń bir bóligin halyqqa qaıtarýdy atady. Saıası bılik júıesi ózgergen kezde qoǵamda da, halyqtyń psıhologııasynda da ózgerister bolatynyn áńgime etti. Bul ózgeris úkimettik emes uıymdardyń, partııalardyń kúsheıýine alyp keletinin, ol óz kezeginde bılikte myqty júıe qalyptastyratynyn baıandady. «Sizder bilesizder me, Ekinshi dúnıejúzilik soǵysta Ulybrıtanııanyń qansha soldat joǵaltqanyn. Bilmeıtin bolýlaryńyz múmkin. Keńes Odaǵynan sol soǵysta 28 mıllıon adam qaza tapqanyn kóbi biledi. Al, jeti jyl boıy soǵysqa qatysqan aǵylshyndardan 340 myń azamat ajal qushqan. Bul salystyrmaly túrde óte az», degen Búrkit Aıaǵan aǵylshyn úkimetiniń halyq aldynda jaýapkershiligi joǵary bolǵanyn, soldattardy jaýyp turǵan oqqa aıdamaǵanyn aıta kelip, bılikke baqylaý bolsa, halyq aldynda jaýapkershiligi joǵary bolatynyn jetkizdi.
Dóńgelek ústelde negizinen adam kapıtaly, zamanaýı tehnologııany damytý, kásipkerlik máseleleri talqylandy. Qoǵam qaıratkeri Seıdahmet Quttyqadamnyń, Aýyl sharýashylyǵy mınıstrliginiń mamany, ǵalym Beısen Ahmetulynyń, basqa da azamattardyń pikirleri tyńdalyp, talqyǵa salyndy.
Aıgúl SEIILOVA, «Egemen Qazaqstan»