Semeıde jańadan ashylǵan Sport akademııasynyń quramyna qaladaǵy balalar men jasósipirimder sport mektebi jáne jekpe-jek túrlerine arnalǵan zaly bar ınternat kirdi.
200 balaǵa shaqtalǵan, ishinde ashanasy men kúres zaldary bar ınternattyń qurylysy 2015 jyly bastalǵan bolatyn. Nysan qaladaǵy №1 Balalar men jasóspirimder sport mektebiniń janynan oryn tepken. Qurylys jumystary tolyq aıaqtalǵan soń, úsh nysannyń basy biriktirilip, Sport akademııasyn qurý týraly sheshim qabyldandy.
Sport akademııasynyń ashylý saltanatynda balǵyn sportshylardy Shyǵys Qazaqstan oblysynyń ákimi Danıal Ametov pen Olımpıada chempıony Olga Rypakova quttyqtady.
– Akademııa sportty súıgen jasóspirimder úshin úlken múmkindik ekendigi sózsiz. Osyǵan deıin oblysymyzdyń shalǵaı jatqan aýyldaryndaǵy jasóspirimder úshin qalaǵa kelip, sheberlikterin shyńdaýǵa jaǵdaı bolmaǵan edi. Endi daryndy balaqaılar osy sport ınternatynda oqyp, bilim alyp, sportpen aınalysyp, baıraqty básekelerde el namysyn qorǵaıtyn bolady. Barlyqtaryńyzdy osy qýanyshtaryńyzben quttyqtaımyn! – dedi Olga Rypakova.
Nysannyń qurylysy «Paryz» qaıyrymdylyq qorynyń demeýshiligimen júzege asqan. Sport akademııasynyń dırektory Mereıǵaly Qoshqynovtyń aıtýynsha, akademııaǵa oblystyń aýyl-aımaqtarynan daryndy balalar iriktelip alynyp, dzıýdo, sambo, grek-rım jáne erkin kúres syndy sport túrlerimen shuǵyldanatyn bolady. Al oqý-jattyǵý jumystaryn Reseı, Mońǵolııa, Ázerbaıjan elderinen kelgen bilikti bapkerler júrgizbek.
Oblys basshysy osy sport akademııasyna «Semeı» ataýyn berýdi de usyndy. Bul usynysty halyq qyzý qoldady.
Raýshan NUǴMANBEKOVA,
jýrnalıst
SEMEI